Իրանը կարող է դրական դեր խաղալ ղարաբաղյան կարգավորման մեջ. դեսպան
Իրանը կարող է դրական դեր խաղալ ղարաբաղյան հակամարտության կարգավորման մեջ, հայտնեց Հայաստանում Իրանի Իսլամական Հանրապետության Արտակարգ և Լիազոր դեսպան Սեյեդ Ալի Սաղայանը։
«Հաշվի առնելով այն հանգամանքը, որ Իրանը շատ սերտ հարաբերություններ ունի և Հայաստանի, և Ադրբեջանի, ինչպես նաև տարածաշրջանի այլ երկրների, մասնավորապես՝ Թուրքիայի հետ, ապա այն կարող է շատ դրական դեր խաղալ»,- չորեքշաբթի Մամուլի ազգային ակումբում ասաց դեսպանը։
Դրա հետ մեկտեղ, դիվանագետն ընդգծեց, որ ցանկացած հակամարտության լուծման պետք է հասնել բացառապես խաղաղ բանակցությունների ճանապարհով և ոչ այլ կերպ։
«Մենք միշտ կողմ ենք եղել այն մտքին, որ ոչ մի հակամարտություն կամ բախում չեն օգնել որևէ ժողովրդի կամ երկրի»,- ավելացրեց նա։
Դեսպանը նաև ցավակցություն է հայտնել վերջերս Ղարաբաղի և Ադրբեջանի զինված ուժերի շփման գոտում բախման հետևանքով զոհվածների ծնողներին։ Ըստ իրանցի դիվանագետի, տվյալ միջադեպը «սադրանք է տարածաշրջանի սահմաններից դուրս գտնվող ուժերի կողմից»։
Հունիսի 18-ին ժամը 23:30-ի սահմաններում Ադրբեջանի ԶՈւ հատուկ նշանակության ջոկատայինները հատելով ղարաբաղաադրբեջանական զորքերի շփման գոտու հյուսիսարևելյան հատվածը։ Պաշտպանական թեժ մարտերի ընթացքում ղարաբաղյան կողմից զոհվել է չորս հոգի, ևս չորսը վիրավորվել են։ Ադրբեջանական ջոկատայինները կրելով կորուստներ՝ դիմել են փախուստի: -0-
