ՀՀ նախագահը կոչ է արել դադարեցնել տարածաշրջանում սպառազինությունների մրցավազքը

ՀՀ նախագահ Սերժ Սարգսյանը կոչ է արել դադարեցնել տարածաշրջանում սպառազինությունների մրցավազքն ու տարածաշրջանային ինտեգրացիա զարգացնել։

«Հայաստանը բազմիցս կոչ է արել իր արևելյան հարևանին` Ադրբեջանին, մեր երկրների հնարավորություններն ի սպաս դնել տարածաշրջանի կայունացմանն ու զարգացմանը: Սպառազինությունների մրցավազքն ու ռազմատենչ հայտարարությունները մեր երեխաներին չեն կարող լավ ապագա խոստանալ»,- նախօրեին «Կոնրադ Ադենաուեր» գերմանական հիմնադրամում «Հայաստան. հանուն անվտանգ և բարգավաճող Հարավային Կովկասի» թեմայով ելույթի ժամանակ ասաց  նա։

«Եվ ես դա ասում եմ որպես մի մարդ, ով անցել է իրեն պարտադրված պատերազմի բովով, ճաշակել հաղթանակի բերկրանքը, բայց և երբեք չի մոռանա պատերազմի պատճառած դառնությունները»,- ընդգծեց Սարգսյանը, որի ելույթի տեքստը տրամադրել է նախագահի մամուլի ծառայությանը։

Նա նշեց, որ ի վերջո մի օր, երբ տարածաշրջանում սկսվեն տնտեսական ինտեգրացիոն գործընթացները, «մենք իսկապես կարող ենք շատ ավելի հեշտությամբ լուծել ղարաբաղյան հիմնախնդիրն ու ապահովել մեր ժողովուրդների ապահով, անվտանգ և բարեկեցիկ գոյությունը, քան այսօրվա անվստահության և կասկածանքի մթնոլորտում»: Սարգսյանը համոզմունք հայտնեց,  որ տարածաշրջանային ինտեգրացիայի հայկական կողմի մոտեցումները կիսում են նաև Վրաստանի  գործընկերները:

«Մենք իրավունք ունենք նաև նման վերաբերմունք ակնկալել տարածաշրջանում ներգրավված մեր գործընկերներից: Մենք անընդհատ խոսում ենք ինտեգրացիան և փոխկապակցվածությունը խթանելու մասին, բայց ի՞նչ քայլեր ենք անում»,- նշեց հայկական պետության ղեկավարը։

Ինչպես ասաց Սարգսյանը, նույնիսկ Եվրամիության Արևելյան գործընկերության շրջանակներում որոշ երկրներ փորձում են սահմանափակել տարածաշրջանային համագործակցության հնարավորությունները: «Օրինակ Ադրբեջանը, ոգևորվելով երկար տարիներ ՏՐԱՍԵԿԱ ծրագրին Հայաստանի մասնակցությունը սահմանափակելու իր ջանքերից, փորձում է նույն գործելաոճը տարածել նաև Արևելյան գործընկերության վրա»,- հայտարարեց ՀՀ նախագահը։ -0-