Վերջին դիվերսիայով Ադրբեջանը փորձել է ստուգել ղարաբաղյան հակամարտության հնարավոր ուժային լուծման վերաբերյալ Հայաստանի և համաշխարհային հանրության արձագանքը, այդ կարծիքին է «Ժառանգություն» ընդդիմադիր խորհրդարանական խմբակցության ղեկավար Ստեփան Սաֆարյանը։
Հունիսի 18-ին ժամը 23-ն անց 30-ի սահմաններում Ադրբեջանի ԶՈՒ հատուկ նշանակության ջոկատայինները հատելով ղարաբաղաադրբեջանական զորքերի շփման գոտու հյուսիսարևելյան հատվածը։ Պաշտպանական թեժ մարտերի ընթացքում ղարաբաղյան կողմից զոհվել է չորս հոգի, ևս չորսը վիրավորվել են։ Ադրբեջանական ջոկատայինները կրելով կորուստներ՝ դիմել են փախուստի:
«Ես կարծում եմ, որ այդ դիվերսիայի գլխավոր նպատակն էր ստուգել Հայաստանի և համաշխարհային հանրության արձագանքը, եթե Ադրբեջանը ռազմական գործողություններ սկսի»,- ասաց Սաֆարյանը։
Միաժամանակ պատգամավորը զարմանք է հայտնել այդ սադրանքի վերաբերյալ համաշխարհային հանրության, և առաջին հերթին ԵԱՀԿ Մինսկի խմբի համանախագահ երկրների արձագանքի առնչությամբ:
Նա նշեց, որ երեկվա «համանախագահների անհասցե հայտարարությունը», որտեղ կոնկրետ չի նշվում միջադեպի մեղավորը, և պատասխանատվությունը երկու երկրների վրա է դրվում, ամենաթողության մթնոլորտ է ստեղծում, և հակամարտության գոտում կարող է սրել իրավիճակը ։
Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին։
1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։
Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։
1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։ Պատերազմի հետևանքով երկու կողմից զոհվեց մոտավորապես 25-30 հազ մարդ և մոտ մեկ միլիոնը ստիպված եղավ լքել բնակավայրերը։
Զինադադարի ռեժիմի մասին համաձայնությունը պահպանվում է մինչ այժմ։
1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան։-0-
