«Ոսկե ծիրան» կինոփառատոնի կազմակերպիչները հրապարակել են մրցութային ծրագիրը և ժյուրիի կազմը

«Ոսկե ծիրան» երևանյան 7-րդ միջազգային կինոփառատոնի տնօրեն Միքայել Ստամբոլցյանն ուրբաթ  հրապարակեց մրցութային ծրագիրը և ժյուրիի կազմը։

«Ոսկե ծիրան» ամենամյա միջազգային կինոփառատոնը տարածաշրջանում ամենահեղինակավորներից մեկն է և անցկացվում է 2004թ.-ից։ «Ոսկե ծիրան» 7-րդ կինոփառատոնը տեղի կունենա հուլիսի 17-18-ը Երևանում, որտեղ աշխարհի 62 երկրներից ավելի քան 100 ֆիլմ կներկայացվի։

«Անցած տարիների նման այս տարի ևս մենք երեք ծրագիր ունենք՝ երկու միջազգային, որոնք իրենց մեջ խաղարկային և վավերագրական ֆիլմերի մրցույթ են ներառում և «Հայկական համայնապատկեր» ազգային ծրագիրը»,- ուրբաթ մամուլի ասուլիսի ժամանակ ասաց Ստամբոլցյանը։

«Միջազգային խաղարկային ֆիլմ» ծրագրում 13 ֆիլմ է ներառված, որոնցից  երկուսը Հայաստանից՝ Վիգեն Չալդրանյանի «Մաեստրո» և Սուրեն Բաբայանի «Մի նայիր հայելուն»։ «Միջազգային վավերագրական ֆիլմ» ծրագրում 14 ֆիլմ է ընդգրկված, որոնցից մեկը՝ Էդգար Բաղդասարյանի «Արարատից մինչև Սիոն»։ «Հայկական համայանապատկեր» ազգային ծրագրում 17 ֆիլմ է ներառվել, դրանցից ինը՝ Հայաստանից։

Ըստ Ստամբոլցյանի՝ փառատոնը կբացի Անրի Վերնոյի հայտնի  «Մայրիկ» կինոնկարը, որը նվիրված է մեծ ռեժիսորի 90-ամյակին, իսկ կփակի «Լավագույն կարճամետրաժ ֆիլմ» անվանակարգում Կաննի կինոփառատոնի մրցանակակիր,  ֆրանսահայ ռեժիսոր Սերժ Ավետիքյանի «Շների կղզի» կինոնկարը։

Ժյուրիի նախագահների թվում են՝ հայտնի իսլանդացի ռեժիսոր և պրոդյուսեր Ֆրիդրիք Թոր Ֆրիդրիքսոնը, իտալացի կինոքննադատ և լրագրող Լուչիանո Բարիզոնեն, արվեստագիտության պրոֆեսոր Արմեն Մեդվեդևը, արվեստաբան Դավիթ Մուրադյանը և Լեհաստանից արվեստների դոկտոր, աստվածաբան Մարեկ Լիսը:--0--