Հայաստանում հաշմանդամություն ունեցող անձանց հանդեպ անհրաժեշտ է ճիշտ և հարգալից վերաբերմունք ձևավորել, հինգշաբթի հաշմանդամների իրավունքների մասին խորհրդարանական լսումների ժամանակ ասաց աշխատանքի և սոցիալական հարցերի փոխնախարար Ջեմմա Բաղդասայանը։
2010թ.-ի հունվարի 1-ի դրությամբ՝ Հայաստանում ավելի քան 179,2 հազար հաշմանդամ է բնակվում, որոնց 64 տոկոսն՝ ավելի քան 114,7 հազար հաշմանդամ, աշխատունակ տարիքի մարդիկ են։
«Հաշմանդամություն ունեցող անձանց հանդեպ մենք պետք է ճիշտ վերաբերմունք, նրանց հետ շփվելու ճիշտ էթիկա ձևավորենք։ Մենք պետք է ճիշտ տերմիններ օգտագործենք, որպեսզի չվիրավորենք հաշմանդամություն ունեցող անձանց»,- ասաց նա։
Մասնավորապես, ինչպես նշեց Բաղդասարյանը, նույնիսկ օմբուդսմենի գրասենյակի կողմից ներկայացված հաշմանդամների իրավունքների ոլորտի հետազոտություններում ոչ ճիշտ ձևակերպումներ կան, օրինակ, տեղ են գտնում այնպիսի բառակապակցություններ, ինչպիսիք են «հաշմանդամ երեխաներ և լիարժեք առողջ երեխաներ»
Ւնչպես ընդգծեց փոխնախարարը, նման վարքն անթույլատրելի է։
Նա ավելացրեց, որ հաշմանդամություն ունեցող անձանց հանդեպ ճիշտ վերաբերմունք պետք է նաև լրագրողներին սովորեցնել։
Ինչպես հայտնեց Բաղդասարյանը, ՀՀ կառավարությունը հատուկ կարևորություն է տալիս հաշմանդամություն ունեցող անձանց խնդիրների լուծմանը, և բոլոր միջոցները ձեռնարկվում են՝ հաշմանդամաներին հասարակական կյանքում ներգրավելու, նրանց հավասար իրավունքների և հնարավորությունների երաշխավորման համար։
Պետական քաղաքականության հիմնական ուղղությունը հաշմանդամություն ունեցող երեխաների համար կրթության հասանելիության ապահովումն է, հաշմանդամություն ունեցող անձանց զբաղվածության ապահովումը։
Փոխնախարարն աջակցել է հաշմանդամություն ունեցող անձանց սոցիալական պաշտպանության մասին նոր օրենքի մշակման գաղափարին։
Ըստ նրա՝ օրինագիծն արդեն մշակվում է և կառավարության կողմից հավանության արժանանալուց հետո ՀՀ Ազգային ժողով կներկայացվի ։ -0-
