Հայոց լեզվի միասնական պետական քննությունների արդյունքները կարող են բարձրացվել ոչ շատ, քան 1 միավորով, հայտնեց ՀՀ կրթության և գիտության փոխնախարար Մանուկ Մկրտչյանը։
Հայոց լեզվի և գրականության ՄՊՔ-ից կտրվողների թիվը շրջանավարտների ավելի քան 10 տոկոսն է կազմել, միայն երկու հոգի են բարձր գնահատական ստացել, միջին միավորը կազմել է 10,8։ Ցածր գնահատականներն ու բարդ թեստերը ծնողների և մասնագետների մոտ զայրույթ են առաջացրել, նրանք կարծում են, որ քննական հարցերը դպրոցական ծրագրի շրջանակներից դուրս է եղել։
«0,5-1 միավորից շատ բարձրացում պետք է չսպասել... Իհարկե, եղել են առաջադրանքներ, որոնք լուրջ քննադատություններ են առաջացրել, և որոնց շուրջ մենք համաձայնության ենք եկել։ Այդ առաջադրանքներով էլ, որոնք 3-4-ն են, կտրվեն միավորները»,- չորեքշաբթի մամուլի ասուլիսի ժամանակ ասաց Մկրտչյանը։
Ըստ նրա, հայոց լեզվի քննության արդյունքները կներկայացվեն հունիսի 23-ից հետո, երբ կհրապարակվեն բոլոր քննությունների արդյունքները։
Նա ավելացրեց, որ քննությունների կազմակերպման և անցկացման, պատրաստման և քննական առաջադրանքների գաղտնիությունը երաշխավորելու, շրջանավարտների համար ուղեցույցի մշակման պատասխանատվությունը կրում է Գնահատման և թեստավորման կենտրոնը։
Ինչպես տեղեկացրեց փոխնախարարը, քննական թեստերը որակյալ են համարվում այն դեպքում, երբ շրջանավարտների ստացած միջին միավորը 11-14 է կազմում։
«Նման ցուցում տրվում է թեստերի կազմողներին։ Հենց այդ պատճառով էլ թեստեր կազմողները, բացի լավ մասնագետ լինելուց, պետք է փորձառու լինեն, նաև այնպիսի մասնագետներ, ովքեր երկար տարիներ առաջադրանքներ են կազմել, աշխատել են ուսուցիչների և աշակերտների հետ»,- նշեց նա։
Ինչպես ասաց փոխնախարարը, առաջադրանքի հետ վիճելի իրավիճակ ստեղծվելու դեպքում առավելությունը տրվելու է դասագրքերով հաստատված տարբերակին։
Ըստ Մկրտչյանի, աշակերտն ուսումնական ձեռնարկով է առաջնորդվում, և պարտավոր չէ դասագրքում շարադրվածից ավել իմանալ։
Հայաստանում ՄՊՔ հիմնական փուլը կտևի մինչև հունիսի 23-ը։ ՄՊՔ-ին կմասնակցեն ավելի քան 17 հազար շրջանավարտներ Հայաստանից և Լեռնային Ղարաբաղից։ ՄՊՔ անցկացվում են հետևյալ առարկաներից՝ հայոց լեզու և գրականություն, կենսաբանություն, ընդհանուր պատմություն, աշխարհագրություն, ֆիզիկա, մաթեմատիկա, հայոց պատմություն, քիմիա, ռուսաց լեզու և օտար լեզու (անգլերեն, ֆրանսերեն, գերմաներեն, իսպաներեն, իտալերեն կամ պարսկերեն)։ -0-
