Հայաստանի և Ղարաբաղի ԶՈՒ-ն տարածաշրջանում ամենաուժեղն է. փորձագետ

Հայաստանի և Լեռնային Ղարաբաղի Զինված ուժերը տարածաշրջանում ամենաուժեղն են, ասաց Ազգային և ռազմավարական հետազոտությունների հայկական կենտրոնի տնօրեն Ռիչարդ Գիրագոսյանը։

«Սակայն երկարատև հեռանկարում վտանգ կա, որ ուժերի  այդ բալանսը կարող է Ադրբեջանի օգտին փոխվել»,- չորեքշաբթի «Տարածաշրջանում ուժերի հավասարակշռության գնահատականը. զեկույցներ` նվիրված Թուրքիայում, Ադրբեջանում, Վրաստանում և տարածաշրջանում պաշտպանության բարեփոխման և ռազմաքաղաքացիական հարաբերություններին» թեմայով կլոր սեղանի ժամանակ  ասաց նա։

Ըստ Գիրագոսյանի՝ Ադրբեջանի նախագահ Իլհամ Ալիևի կողմից՝ գրեթե ամեն շաբաթ հնչող  ռազմատենչ հայտարարություններն իրենց մեջ դիվանագիտությանը սպառնալիք են պարունակում և դրան մեծ վնաս են պատճառում։

Միաժամանակ, երկու երկրների ռազմական կառույցների միջև առկա տարբերության մասին խոսելիս նա ասաց, որ Հայաստանում պաշտպանական բարեփոխումներն ինստիտուցիոնալ բնույթ են կրում, իսկ Ադրբեջանում՝ ինստիտուցիոնալ կաշառակերության բնույթ, որի կենտրոնում գտնվում է Ադրբեջանի պաշտպանության նախարարությունը։

«Հենց այդ կաշառակերության պատճառով է, որ չնայած միլիարդավոր դոլար ծախսերին՝ ադրբեջանական բանակում ոչ մի իրական բարեփոխում չի նկատվում»,- ասաց Գիրագոսյանն՝ ավելացնելով, որ պաշտպանական ոլորտում ոչ թե կարևոր է Ադրբեջանի ծախսերի գումարը, այլ միջոցների օգտագործման ոլորտները։

Ինչպես ընդգծեց փորձագետը, Հայաստանն արդեն հասկացել է, որ ռազմական ուժը «ոչ թե քանակով է դատվում, այլ՝ որակով»։ «Ներկայիս Հայաստանը և Լեռնային Ղարաբաղը պատրաստվում են 21-րդ դարի պատերազմներին, այն ժամանակ, երբ Ադրբեջանը 19-րդ դարում է մնացել։ Այն անցյալի պատերազմներին է պատրաստվում, այլ ոչ ապագայի»,- կարծում է նա։

Գիրագոսյանն Ադրբեջանի ռազմական դոկտրինան որպես «իրականությունից հեռու հեքիաթ» բնութագրեց։ «Ադրբեջանը մինչ այսօր դեռ չի սկսել իր ռազմական բարեփոխումները։ Եվ եթե նույնիսկ դրանք վաղը սկսվեն, Հայաստանը «հնարավորությունների պատուհանի» կտնօրինի, քանի որ բարեփոխումների մեկնարկումից միայն 8-10 տարի անց կարելի է նորմալ վիճակի մասին խոսել»,- պարզաբանեց նա։ -0-