Ոչ պաշտոնական տվյալներով, Հայաստանում տարեկան ավելի քան 300 ինքնասպանություն է կատարվում, ասաց «Նոր Արաբկիր» առողջության կենտրոնի հոգեթերապևտ Հարություն Մինասյանը:
«Ինքնասպանության թիվն աճել է, ամեն օր թերթերում կարելի է ինքնասպանության հրապարակումներ գտնել, և ըստ իմ հաշվարկների, օրական ինքնասպանություն է գործում մեկ մարդ, ինչը տարեկան ավելի քան 300 մարդ է կազմում, ընդ որում դա հիմնականում երիտասարդության ներկայացուցիչներն են»,- ասաց Մինասյանը:
Ըստ նրա, նման աճը մեծաքանակ գործոններով է պայմանավորված, բայց առաջին հերթին՝ հոգեբուժական բուժման վատ վիճակով, ճգնաժամային սենյակների, հոգեբանական օգնության թեժ գծի բացակայությամբ:
Մինասյանը նշեց, որ ինքնասպանությունների 90 տոկոսի դեպքում ինքնասպանություն են գործում հոգեկան խանգարում ունեցող մարդիկ, ինչպես նաև նրանք, ովքեր զգայուն նյարդային համակարգ ունեն և գտնվում են դիսթրեսում (օրգանիզմը վնասող սթրես):
«Բանական մարդը երբեք ինքնասպանություն չի գործի: Եթե այդ պահին սթրեսային վիճակում գտնվող մարդու մոտ ինչ-որ մեկը լինի, որ խոսի հետը, կարեկցի նրան, ապա մարդը կմտածի իր արարքների մասին: Գոյություն ունի որոշակի մարդկանց խումբ, որն ինքնասպանության հանդեպ բարձր հակում ունի, և բավական է որևէ գործոն, որպեսզի նրանք դիմեն այդ քայլին»,- ասաց նա:
Միաժամանակ Մինասյանն ընդգծեց, որ Հայաստանում ինքնասպանությունների մի մասը որպես այդպիսին չեն ձևակերպվում, այլ որպես դժբախտ պատահար են գրանցվում:
Հոգեթերապևտը նշեց, որ զարգացած քաղաքակիրթ երկրներում ավելի շատ ինքնասպանություն է կատարվում, և որքան զարգացած է հասարակությունը, այդքան շատ են ինքնասպանությունները:
«Դա պայմանավորված է նրանով, որ զարգացած երկրներում ամեն ինքնասպանության դեպք՝ հաջողված կամ ոչ հաջողված փորձ, գրանցվում է՝ հաշվի չառնելով արդեն այն հանգամանքը, որ զարգացած երկրներում սթրեսային իրավիճակներն ավելի շատ են»,- ասաց նա:
Ավելին, ըստ մասնագետի, ինքնասպանության վրա ազդում է և աշխարհագրությունը, և եղանակային պայմանները, օրինակ, ապացուցված է, որ հյուսիսային երկրներում ավելի շատ ինքնասպանություններ են կատարվում, քան տաք երկրներում: -0-
