ԵԽ մարդու իրավունքների հանձնակատարը հոկտեմբերին կայցելի Երևան

ԵԽ մարդու իրավունքների հանձնակատար Թոմաս Համմարբերգը հոկտեմբերին կայցելի Երևան` ԵԽ «Ժողովրդավարության ապագայի համար» ֆորումին մասնակցելու նպատակով:

Ինչպես հաղորդում է ՀՀ ԱԺ հասարակայնության և տեղեկատվության միջոցների հետ կապերի վարչությունը, այս մասին ԵԽ հանձնակատարը ասել է Լիմասոլում (Կիպրոս) կայացած ՀՀ ԱԺ խոսնակ Հովիկ Աբրահամյանի հետ հանդիպման ժամանակ:

Հանդիպման ընթացքում Աբրահամյանը  կարևորել է հանձնակատարի գրասենյակի կողմից իրականացվող մոնիտորինգը, որը լուրջ խթան է Հայաստանի, ինչպես նաև ԵԽ մյուս անդամ պետությունների կողմից մարդու իրավունքների պաշտպանությանն ուղղված բարեփոխումների իրագործման համար:

Զրուցակիցները քննարկել են նաև Հայաստանում ընթացող օրենսդրական բարեփոխումներին, տարածաշրջանային խնդիրներին  առնչվող հարցեր:

ՀՀ ԱԺ խոսնակը հանդիպել է նաև Մարոկկոյի Ներկայացուցիչների պալատի նախագահ Աբդելվախեդ Ռադիի, Ուկրաինայի Գերագույն Ռադայի նախագահ Վլադիմիր Լիտվինի, Լեհաստանի Սենատի նախագահ Բոգդան Բորուսևիչի, Իտալիայի խորհրդարանի պատգամավորների պալատի նախագահ Ջանֆրանկո Ֆինիի հետ:

Աբրահամյանը գտնվում էր Կիպրոսում` Խորհրդարանների նախագահների եվրոպական համաժողովին մասնակցելու նպատակով:-0-