Հայոց լեզվի ՄՊՔ-ի միավորները կբարձրացվեն թեստերի բարդության պատճառով. նախարար

Դիմորդների միավորները  կբարձրացվեն, քանի որ հայոց լեզվի և գրականության միասնական պետական քննությունների (ՄՊՔ) թեստերը սովորականից ավելի բարդ էին, երեքշաբթի լրագրողներին ասաց ՀՀ կրթության և գիտության նախարար Արմեն Աշոտյանը:

Հայաստանում հունիսի 4-ին կայացած հայոց լեզվի և գրականության միասնական պետական քննություններից (ՄՊՔ) կտրված դիմորդների թիվը կազմել էր 10 տոկոսից ավելին, առավելագույն բալ էր ստացել միայն երկու դիմորդ, 20 բալանոց համակարգով միջին բալը կազմել է 10,8 բալ: Ցածր արդյունքներն ու բարդ թեստերը տարակուսանքի ալիք էին բարձրացրել ծնողների և մասնագետների շրջանում, ովքեր կարծում են, որ քննական հարցերը դուրս  են եկել դպրոցական ծրագրի շրջանակներից:

«Դեռ չեմ կարող ասել, թե որքանով կբարձրացվեն բալերը, կարծում եմ`երեք միավորից քիչ: Գնահատման և թեստավորման կենտրոնն այս կապակցությամբ որոշում կկայացնի: Կորոշվի նաև, թե կոնկրետ որ հարցերի կապակցությամբ կվերանայվեն գնահատականները», - ասաց նախարարը:

Նրա խոսքերով` հայոց լեզվի թեստերը, անխոս, բարդ էին, սակայն դա ավելի լավ մրցութային հնարավորություններ է ստեղծում, քան համատարած բարձր բալերը:

«Նախորդ տարի նույն խնդիրն էր` կապված հայոց լեզվի հետ: Իմ կարծիքով` դա պայմանավորված է նրանով, որ մենք առանձնահատուկ պահանջներ ունենք մայրենի լեզվի նկատմամբ: Մեծ մանկավարժական փորձ ունեցող ամեն մի մասնագետ թեստեր է կազմում` մայրենի լեզվի գիտելիքների մասին սեփական պատկերացումների համաձայն», - ավելացրեց Աշոտյանը:

Նրա կարծիքով` մասնագետներն արդեն եկել են համապատասխան եզրակացության:

Հայաստանում 2010 թ.-ին ՄՊՔ-ի հիմնական փուլը կտևի մինչև հունիսի 23-ը: ՄՊՔ-ին կմասնակցի ավելի քան 17 հազար դիմորդ` Հայաստանից և Լեռնային Ղարաբաղից:

ՄՊՔ կանցկացվի 10 առարկաներից` հայոզ լեզու և գրականություն, կենսաբանություն, ընդհանուր պատմություն, աշխարհագրություն, ֆիզիկա, մաթեմատիկա, հայոց պատմություն, քիմիա, ռուսաց լեզու և օտար լեզուներ (անգլերեն, ֆրանսերեն, գերմաներեն, իսպաներեն, իտալերեն կամ պարսկերեն):-0-