Առաջին անգամ Հայաստանում կտոնվի Պետական դրոշի օրը

ԵՐԵՎԱՆ, 14 հունիսի. /Նովոստի-Արմենիա/. Հունիսի 15-ին Հայաստանում առաջին անգամ կտոնվի Պետական դրոշի օրը, ասաց «Մենք» Ազգային արժեքների պահպանման հիմնադրամի տնօրեն Պավել Սարգսյանը։

 «2006 թ.-ի հունիսի 15-ին ընդունվել է դրոշի մասին օրենքը։ Դրանով է պայմանավորված այն, որ մենք կառավարությանն ենք ներկայացրել մեր ծրագիրը՝ առաջարկելով ընդունել Պետական դրոշի մասին օրը՝ համապատասխան միջոցառումների անցկացմամբ։ Ծրագիրն ընդունվել է և գտնվում է վարչապետի հովանու ներքո», - երկուշաբթի «Նովոստի» միջազգային մամուլի կենտրոնում լրագրողներին ասաց Սարգսյանը։

Նրա խոսքերով՝ Պետական դրոշի օրվա կապակցությամբ հունիսի 15-ին ժամը 19։00-ին ՀՀ կառավարության շենքի առջև տոնական երթ կմեկնարկի, որը կանցնի Նալբանդյան, Սայաթ-Նովա փողոցներով, Մաշտոցի պողոտայով և Ամիրյան փողոցով և կավարտվի Հանրապետության Հրապարակում։

Նա նշեց, որ Դրոշի օրը նշվում է շատ երկրներում և ակնկալվում է, որ երթը կդառնա ավանդական և Հայաստանում կանցկացվի ամեն տարի։

Երթը կանցկացվի կառավարության հովանու ներքո՝ ՀՀ մշակույթի, պաշտպանության նախարարությունների և ոստիկանության աջակցությամբ։

Հիմնադրամի տնօրենը նշեց, որ միջոցառմանը հիմնականում կմասնակցեն դպրոցականներ, ուսանողներ և սփյուռքի ներկայացուցիչներ, իսկ առաջիկայում լույս կտեսնի «Մենք մեր մասին» ամսագիրը, որը նվիրված է տոնին։

Սարգսյանը նաև նշեց, որ իրենք կառավարությանը առաջարկել են հաստատել մարզերում նմանատիպ միջոցառումների անցկացումը։-0-