ՀՀ պաշտպանության նախարարը կարճատև զրույց է ունեցել ԱՄՆ-ի պաշտպանության նախարարի հետ
ՀՀ պաշտպանության նախարար Սեյրան Օհանյանը Բրյուսելում կարճատև զրույց է ունեցել Պենտագոնի ղեկավար Ռոբերտ Գեյթսի և Վրաստանի պաշտպանության նախարար Բաչանա Ախալայայի հետ, հաղորդվում է ՀՀ պաշտպանության նախարարության կայքում։
«Հանդիպումների ընթացքում քննարկվել են տարածաշրջանային անվտանգությանը և երկկողմ հարաբերություններին առնչվող հարցեր», - նշվում է տեղեկատվության մեջ։
Հունիսի 10-11-ը ՀՀ պաշտպանության նախարար Սեյրան Օհանյանը Բրյուսելում մասնակցել է Կոսովոյում և Աֆղանստանում ՆԱՏՕ-ի ղեկավարած գործողություններին մասնակցող պետությունների ձևաչափով ՆԱՏՕ-ի և գործընկեր երկրների պաշտպանության նախարարների նիստին։
Նիստի ընթացքում ՀՀ պաշտպանության նախարարը ներկայացրել է Հայաստանի դիրքորոշումները միջազգային առաքելությունների վերաբերյալ։
Կոսովոյի հարցերով քննարկումների ժամանակ պաշտպանության նախարարներն ընդգծել են առաքելության իրականացման գործում արձանագրված առաջընթացը և Կոսովոյում անվտանգության ընդհանուր իրավիճակի բարելավումը:
Նախարարները համաձայնել են, որ Կոսովոյում իրականացվող գործողությունը պետք է շարունակել մինչև երկրում անվտանգության և կայունության լիարժեք հաստատումը։
Աֆղանստանի վերաբերյալ քննարկվել է անվտանգության ապահովման պատասխանատվությունը աֆղանական մարմիններին փոխանցելու գործընթացը: Որպես կարևորագույն բաղադրիչ՝ ընդգծվել է աֆղանական բանակի և ոստիկանության ուժերի կատարելագործմանն ուղղված ՆԱՏՕ-ի ուսումնական առաքելությունն ընդլայնելու և մարդկային ներուժով համալրելու անհրաժեշտությունը։
Աֆղանստանում հայկական զինվորական համակազմն իրականացնում է իր գործունեությունը գերմանական ղերավարության ներքո Կունդուզ գավառում Աֆղանստանում անվտանգության աջակցության միջազգային ուժերի (ISAF) հյուսիսային տարածաշրջանային հրամանատարության կազմում: Համակազմում ընդգրկված են հետևակային դասակ, բժիշկ-սպա և երեք շտաբային սպաներ, խաղաղապահների հերթափոխն իրականացվելու է կես տարին մեկ անգամ:
Կոսովոյում հայ զինվորականները 2004 թ.-ի փետրվարի 12-ից մասնակցում են խաղաղարար առաքելությանը հունական գումարտակի կազմում: Հայկական վաշտը տեղակայված է Կոսովոյի հարավում գտնվող Ուրոշևաց քաղաքում:-0-
