Հայաստանում հրատարակված «Այվազովսկի» ալբոմը Մոսկվայում առաջին կարգի դիպլոմի է արժանացել

Մեծանուն ծովանկարիչ Իվան (Հովհաննես) Այվազովսկու ալբոմը, որը հրատարակվել է Երևանի «Տիգրան Մեծ» տպագրատանը, «Արվեստի գիրք» (կազմող՝ Շ.Խաչատրյան) անվանակարգում առաջին կարգի դիպլոմի է արժանացել, ասաց ՀՀ մշակույթի նախարարությանն առընթեր Գրահրատարակչության գործակալության տնօրեն Էդուարդ Միլիտոնյանը։

Լավագույն հայկական հրատարակչությունները, որոնք հաղթել են Հայաստանի տարբեր մրցույթներում, ներկայացվել էին Մոսկվայում՝ ԱՊՀ երկրների «Գրքարվեստ» միջազգային մրցույթում, որն անցկացվել է հունիսի 2-5-ը։

 «ԱՊՀ երկրների «Գրքարվեստ» յոթերորդ միջազգային մրցույթին մասնակցել են Հայաստանը ներկայացնող գրքեր, որոնք ընտրված էին «Արվեստի գիրք» հայկական մրցույթի մրցանակակիրների թվից։ Ներկայացվել էր 15 գիրք, որոնք մասնակցեցին  9 անվանակարգերում»,- ուրբաթ մամուլի ասուլիսի ժամանակ ասաց Միլիտոնյանը։

Գործակալության տնօրենը նշեց, որ «Գիտություն ու կյանք» անվանակարգում երկրորդ կարգի դիպլոմին արժանացավ «Հայ արվեստի պատմություն» գիրքը, որը հրատարակվել է «Զանգակ-97» հրատարակչությունում, իսկ «Տպագրված է ԱՊՀ-ում» անվանակարգում երրորդ կարգի դիպլոմին արժանացել է «Փրինթինֆո» և «Սարգիս Խաչենց» հրատարակությունների հրատարակած «Կոմիտաս վարդապետ» գիրքը։

Միլիտոնյանն ավելացրեց, որ դիպլոմների հանձնման արարողությունը տեղի կունենա 2010թ.-ի սեպտեմբերին Մոսկվայում մեկնարկող գրքի միջազգային ցուցահանդեսի շրջանակներում:

Այս ամենի կապակցությամբ ՀՀ մշակույթի նախարար Հասմիկ Պողոսյանը նշեց, որ Հայաստանն առավել հաճախ է մասնակցում գրքի միջազգային տոնավաճառներին։

 «Եթե նախկինում մենք հիմնականում մասնակցում էինք Ֆրանկֆուրտում և Մոսկվայում անցկացվող գրքի տոնավաճառներին, ապա արդեն երկրորդ տարին է, ինչ մենք մասնակցում ենք գրքի միջազգային 11 տոնավաճառների, և ամենակարևորն այն է, որ արդեն երկրորդ տարին է, ինչ մասնակցում ենք Փարիզում անցկացվող հեղինակավոր գրքի միջազգային տոնավաճառին»,- ավելացրեց Պողոսյանը։ -0-