Առաջին անգամ 14 երկրների ներկայացուցիչներ, այդ թվում նաև ԱՊՀ կազմում չընդգրկված պետությունները, Հայաստանում կմասնակցեն երիտասարդական Դելփյան խաղերին, որոնք կանցկացվեն հունիսի 26-ից հուլիսի 2-ը, ասաց ՀՀ մշակույթի նախարար Հասմիկ Պողոսյանը։
«Խաղերին կմասնակցի մոտ 550 մարդ (10-25 տարեկան)՝ ներառյալ Հայաստանը։ Ամենամեծը Ռուսաստանի պատվիրակությունն է լինելու»,- ասաց Պողոսյանը, հավելելով, որ հատկացրած քվոտների շրջանակներում պատվիրակության անդամների թիվը տատանվում է 34-ից 80 մարդ։
Մշակույթի նախարարն ընդգծեց, որ Դելփյան խաղերի ողջ պատմության ընթացքում դրանց առաջին անգամ կմասնակցեն ԱՊՀ կազմում չգտնվող երկրների՝ Վրաստանի, Էստոնիայի, Լատվիայի, Հնդկաստանի ներկայացուցիչներ։
Հայաստանում Դելփյան կոմիտեի նախագահ Բարսեղ Թումանյանն իր հերթին նշեց, որ Դելփյան խաղերի անցկացման գլխավոր նպատակը բարձր արվեստի քարոզումն է։
«Արվեստն այսօր ողջ աշխարհում խառնաշփոթ է ապրում, և կարծես՝ կորցրել է իր դեմքը։ «Հասարակություն» և «բարձր արվեստ» հասկացությունները փոքր-ինչ հեռացել են միմյանցից։ Բնականաբար, այստեղից էլ եկավ մ.թ.ա. 582 թվականին գոյություն ունեցած մեխանիզմին վերադառնալու գաղափարը»,- ասավ Թումանյանը։
Դելփյան վեցերորդ խաղերի կազմակերպիչներն են Հայկական ազգային դելփյան կոմիտեն և Հայաստանի պետական ֆիլհարմոնիան։ Խաղերը կանցկացվեն Հայաստանի կառավարության, Մշակույթի նախարարության և ԱՊՀ մասնակից-պետությունների հումանիտար համագործակցության հիմնադրամի աջակցությամբ։
Խաղերը բաղկացած են մրցութային և փառատոնային ծրագրերից։ Մրցութային ծրագիրն ընդգրկում է 17 անվանակարգ՝ դաշնամուր, ջութակ, սաքսոֆոն, ակադեմիական երգեցողություն, ժողովրդական երգոցողություն, էստրադային երգեցողություն, ժողովրդական պար, ակադեմիական պար, կրկեսային արվեստ, լուսանկարչություն, կերպարվեստ (գեղանկարչություն, գծանկար), վեբ-դիզայն, մնջախաղ, հեռուստալրագրություն, նորաձևություն, դի-ջեյ արվեստ, դերասանական արվեստ։
Փառատոնային ծրագրում ընդգրկված է ընդամենը երկու անվանակարգ՝ ժողովրդական արհեստագործություն և ժողովրդական գործիքներ։
Առաջին երիտասարդական Դելփյան խաղերն անցկացվել են Մոսկվայում 2000 թվականին։ -0-
