ՀՀ վարչապետի կարգադրությամբ Euronews և CNN հեռուստաալիքները ներգրավվել են Հայաստանի հարավում դեպի Տաթև վանական համալիր տանող աշխարհի ամենաերկար ճոպանուղու պաշտոնական բացման լուսաբանման գործում, ասաց ՀՀ էկոնոմիկայի փոխնախարար Արա Պետրոսյանը։
Դեպի Տաթև վանական համալիր տանող աշխարհի ամենաերկար ճոպանուղին կբացվի հոկտեմբերի 16-ին: Դեպի Տաթև վանական համալիր տանող ճոպանուղու կառուցման մասին պայմանագիրը ստորագրվել է 2009թ. հուլիսի 14-ին: Ծրագրի արժեքը 6,8 մլն եվրո է։Ճոպանուղու կառուցումը «Տաթևի վերածնունդն ու վերականգնումը» եռամյա ծրագրի բաղկացուցիչ մասն է, որն իրականացնում է Հայաստանի մրցունակության ազգային հիմնադրամը 2009 թվականի փետրվարից։
«Այս ծրագիրը հարավում նոր տուրիստական կենտրոնի ձևավորման և համաշխարհային շուկայում նոր տուրիստական ապրանք ներկայացնելու լուրջ խթան է»,- երեքշաբթի մամուլի ասուլիսի ժամանակ ասաց Պետրոսյանը։
«Ինստեյթ Մենեջմենթ էնդ Ադմինիսթրեյշն Քամփնի» ընկերությունն իրականացնում է
«Տաթև վանական համալիրի վերկանագնում» ծրագիրը, որի համար ներկրվել է ճոպանուղու շինարարության համար սարքավորումը։ Նախատեսված 6,9 մլն եվրոյից արդեն իրականացվել են 4 մլն եվրո գումարի չափով ներդրումներ։ Աշխատանքներում զբաղված է շուրջ 60 մարդ։
Պետրոսյանը նշեց, որ ճոպանուղու համար երեք հենարաններից երկուսի մոնտաժման աշխատանքներն արդեն ավարտված են, երրորդ հենարանի աշխատանքները 80 տոկոսով են իրականացվել։ «Բոլոր աշխատաքներն իրականացվում են ծրագրված ժամանակացույցի շրջանակներում»,- պարզաբանեց նա։
Տաթև և Հալիձոր համայնքներում հենարանային կայարանների շինարարության աշխատանքներն ավարտվել են, համապատասխանաբար՝ 80 և 45 տոկոսով։
Ըստ փոխնախարարի՝ նախատեսվում է, որ տվյալ նախագծի կյանքի կոչումը 3-4 տոկոսով կմեծացնի ներգնա տուրիզմի ծավալը ։
«Տաթևը միշտ այն գրավիչ տուրիստական ռեսուրսը և գոտին է եղել, որը ճանապարհների և ենթակառուցվածքների անկատարության պատճառով անհասանելի է եղել Հայաստան ժամանող տուրիստների համար»,- ասաց Պետրոսյանը։
Շնորհիվ ծրագրի իրականացման՝ լիովին կվերականգնվի Տաթևի վանական համալիրը՝ հայկական միջնադարյան ճարտարապետության մարգարիտը։ Վանքը ծրագրվում է կրթական համալիրի և տուրիզմի կենտրոնի վերածել։
Տաթևի վանքը խոշոր մշակութային կենտրոն է եղել՝ ձեռագրատնով, արհեստանոցով, գրադարանով և ամենահայտնի համալսարաններից մեկով։—0—
