Հայաստանի գլխավոր վարակաբանը խորհուրդ է տալիս շոգ եղանակին ավելի շատ ջուր խմել և հրաժարվել թխվածքից
ԵՐԵՎԱՆ, 8 հունիսի. /Նովոստի-Արմենիա/. Հայաստանի գլխավոր վարակաբան Արա Ասոյանը խորհուրդ է տալիս ամառվա շոգին ավելի շատ ջուր խմել, ավելի շատ բանջարեղեն ուտել և հրաժարվել թխվածքից։
«Որպեսզի շոգին օրգանիզմը չջրազրկվի, անհրաժեշտ է օրական հինգ-վեց բաժակ ջուր խմել, եթե դուք չեք տառապում սիրտ-անոթային հիվանդություններից։ Օրգանիզմում աղերի պակասը լրացնելու համար կարելի է նաև խմել հանքային ջուր»,- երկուշաբթի Հայաստանի երկրորդ հեռուստաալիքի «Չորրորդ ստուդիա» հեռուստահաղորդման եթերում հայտնեց Ասոյանը։
Նրա խոսքերով, ամառվա տապին պետք է ավելի քիչ միս ուտել և նախապատվությունը տալ բանջարեղենին։ Ասոյանը նշեց նաև, որ շոգ եղանակին ավելի շատ պետք է օգտագործել նաև հայկական ավանդական կաթնաթթվային սննդամթերք՝ մածուն և թան։
Գլխավոր վարակաբանն ավելացրեց, որ պետք է հրաժարվել թխվածքից։ «Ոչ ոք չգիտի, թե ինչպիսի պայմաններում և ով է թխում այդ թխվածքը, որը վաճառվում է խանութներում և սուպերմարկետներում, արտադրողն ունի՞, արդյոք, լիցենզիա»,- ասաց Ասոյանը։
Գլխավոր վարակաբանը նշեց, որ հայ բժիշկները պատրաստվում են աղիքայի ինֆեկցիաների ամառային սրմանը, և հավելեց, որ շոգ եղանակին ցանկացած մարդու մոտ նույնիսկ առանց ինֆեկցիայի կարող է ստամոքսի խանգարում սկսվել։ Ասոյանն ընդգծեց, որ ցանկացած դեպքում սրման ժամանակ պետք է խորհրդակցել բժշկի հետ և հրաժարվել ֆաստ-ֆուդից։
Մրգերից թունավերվելու հնարավորության վերաբերյալ բժիշկը նշեց, որ ներկայումս այդպիսի որևէ դեպք չի արձանագրվել։ -0-
