Ղարաբաղյան հարցը Հայաստանի և Ադրբեջանի հարցն է, և միայն նրանք կարող են լուծել այն, հայտարարել է Ռազմավարական հետազոտությունների ռուսական ինստիտուտի տնօրեն Լեոնիդ Ռեշետնիկովը:
«Մենք կարող ենք ինչ-որ բան խորհուրդ տալ, սակայն մենք չենք կարող հայերին կամ ադրբեջանցիներին հրամայել ղարաբաղյան հարցում այս կամ այն անել: Այլ երկրները կարող են փորձել հրամայել: Ես ի նկատի ունեմ աշխարհի միակ երկրին, որը մշտապես դա արել և կարող է անել, պարզ է, թե ում մասին է խոսքը: Նրանք կարող են դա անել, սակայն Ռուսաստանն այդպես չի կարող վարվել, դա մեր քաղաքականության ավանդույթների մեջ չի մտնում», - «Նովոստի-Արմենիա» գործակալությանը տված հարցազրույցում նշել է Ռեշետնիկովը:
«Մենք առաջվա պես կարծում ենք, որ դա շատ բարդ հարց է, և դրա լուծումը կախված չէ ոչ մեկից, բացի Հայաստանից և Ադրբեջանից: Դա դժվար լուծում է, շատ ծանր, իմ կարծիքով՝ հնարավոր է, որ խնդիրը տասնամյակներ շարունակ լուծում չստանա», - կարծում է փորձագետը:
Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին։
1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։
Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։
1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։ Պատերազմի հետևանքով երկու կողմից զոհվեց մոտավորապես 25-30 հազ մարդ և մոտ մեկ միլիոնը ստիպված եղավ լքել բնակավայրերը։
Զինադադարի ռեժիմի մասին համաձայնությունը պահպանվում է մինչ այժմ։
1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան։-0-
