ԵՐԵՎԱՆ, 7 հունիսի. /Նովոստի-Արմենիա/. ԵԱՀԿ-ն բարձր է գնահատում Ոստիկանության բարեփոխումներին ուղղված Հայաստանի քայլերը, Վիեննայում գտնվող ԵԱՀԿ կենտրոնակայանում ԵԱՀԿ երկրների ներկայացուցիչների և ՀՀ ոստիկանության պատվիրակության հանդիպման ժամանակ ասել է ԵԱՀԿ նախագահող Ղազախստանի մշտական ներկայացուցիչ, դեսպան Կաիրատ Աբդրախմանովը:
ՀՀ կառավարությունը ապրիլի 1-ին հավանության է արժանացրել 2010-2011 թ.-ին ՀՀ ոստիկանության գործունեության բարեփոխումների հայեցակարգն ու ծրագիրը: Բարեփոխումների փաթեթը ընդգրկում է իրավապահ կառույցի գործունեության բոլոր ոլորտները:
Առաջին հերթին ծրագրվում է կառուցվածքային բարեփոխումներ անցկացնել: Ոստիկանությունը ապակենտրոնացված է լինելու և առավել մերձեցված բնակչությանը: Օն-լայն կապ է ներդրվելու ոստիկանության և բնակչության միջև, կբարելավվի «թեժ գծի» աշխատանքը, կնվազի թղթաբանությունը:
«Աբդրախմանովը հույս է հայտնել, որ Հայաստանում ծրագրի հաջող իրագործումը օրինակ կարող է ծառայել ԵԱՀԿ այլ երկրների համար», - նշվում է տեղեկատվության մեջ:
ՀՀ ոստիկանապետի տեղակալ Արթուր Օսիկյանն իր հերթին ԵԱՀԿ մասնակից-երկրներին ներկայացրել է բարեփոխումների ծրագիրը: Նա մանրամասն ներկայացրել է բարեփոխումների փաթեթը՝ նշելով, որ այն կազմելու ընթացքում հիմք է ծառայել նաև ԵՄ որոշ անդամ-երկրների փորձը:
«Բարեփոխումների նպատակն է հստակ մեխանիզմների և չափորոշիչների օգնությամբ բարձրացնել ՀՀ ոստիկանության արդյունավետությունը և ամրապնդել ոստիկանության նկատմամբ հասարակության վստահությունը», - ասվում է տեղեկատվության մեջ:
Օսիկյանը վստահեցրել է, որ ՀՀ իշխանությունները հետևողականորեն իրագործելու են ներկայացված բարեփոխումների ծրագիրը և այդ ասպարեզում սերտորեն համագործակցելու են բոլոր շահագրգիռ միջազգային կազմակերպությունների, այդ թվում նաև ԵԱՀԿ-ի հետ: Նա նաև նշել է, որ այս բնագավառում բարձր է նաև Երևանում ԵԱՀԿ գրասենյակի դերը:
ՀՀ նախագահի օգնական Գևորգ Կոստանյանն իր հերթին այլ հարցերի հետ մեկտեղ նշել է, որ ՀՀ ոստիկանության բարեփոխումների ծրագիրը գտնվում է ՀՀ նախագահի անմիջական ուշադրության կենտրոնում:
Նույն օրը ԵԱՀԿ քարտուղարությունում տեղի է ունեցել հայկական պատվիրակության և ԵԱՀԿ գլխավոր քարտուղար Մարկ Պերին դը Բրիշամբոյի հանդիպումը:
Հանդիպման ընթացքում համառոտ ներկայացվել է Հայաստանի ոստիկանության բարեփոխումների ծրագիրը, քննարկվել են ԵԱՀԿ աջակցության հնարավորությունները:
ԵԱՀԿ գլխավոր քարտուղարը, ողջունելով այս բնագավառում առկա ձեռքբերումները, վստահեցրել է, որ ԵԱՀԿ-ն, ինչպես և նախկինում, հետևողականորեն աջակցելու է Հայաստանում իրականացվող բարեփոխումների ծրագրերին:-0-
