Ղարաբաղը չի կարող սակարկության առարկա լինել. հայկական կոալիցիոն կուսակցության ղեկավար

Ղարաբաղը չի կարող սակարկության առարկա լինել որևէ այլ խնդիրների համատեքստում, շաբաթ օրը լրագրողներին ասել է «Բարգավաճ Հայաստան» կոալիցիոն կուսակցության նախագահ Գագիկ Ծառուկյանը՝ մեկնաբանելով ղարաբաղյան խնդրին վերաբերող ՌԴ Դաշնության խորհրդի նախագահ Սերգեյ Միրոնովի կողմից վերջերս արված հայտարարությունը:

Ինչպես հաղորդում են ադրբեջանական ԶԼՄ-ները, Ադրբեջանի Միլի Մեջլիսի նախագահ Օգթայ Ասադովի հետ հանդիպման ժամանակ Միրոնովը իբր թե հայտարարել է, թե «Ռուսաստանը որևէ պետական կազմավորում չի ճանաչում «Լեռնային Ղարաբաղ» անվան տակ և հետագայում չի պատրաստվում ճանաչել այն»:

«Անհրաժեշտ է խնդիրներին ուշադրություն հատկացնել և լուծել դրանք: Անկախ այն բանից, թե ով ինչ կասի, մեր հիմնական սկզբունքը սեփական նպատակներն ու ծրագրերը իրագործելն է՝ Ղարաբաղի միջազգային ճանաչումն ապահովելն է: Ղարաբաղը չի կարող սակարկության առարկա լինել որևէ այլ խնդրի համատեքստում: Սա մենք ասել և շարունակելու ենք ասել, պաշտպանելու ենք սեփական դիրքորոշումները», - ասել է Ծառուկյանը:

Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից  դուրս գալու մասին։

1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։

Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։

1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։ Պատերազմի  հետևանքով երկու կողմից զոհվեց մոտավորապես 25-30 հազ մարդ և մոտ  մեկ միլիոնը ստիպված եղավ լքել  բնակավայրերը։

Զինադադարի ռեժիմի մասին համաձայնությունը պահպանվում է մինչ այժմ։

1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան։-0-