Վիկ Դարչինյանը բռնցքամարտիկի կարիերայի ավարտից հետո ծրագրում է դառնալ փրոմոութեր

Բռնցքամարտի աշխարհի չեմպիոն Վիկ Դարչինյանը ծրագրում է բռնցքամարտիկի կարիերայի ավարտից հետո փրոմոութեր դառնալ։

«Երբ ես մոտ կլինեմ կարիերայի ավարտին, այդ ժամանակ կսկսեմ զբաղվել ակումբներով, թիմով, կսկսեմ տղաների հետ պայմանագրեր կնքել նրանց օգնելու համար», - ուրբաթ Երևանում հայտարարեց նա լրագրողներին։

Դարչինյանը նշեց, որ մեծ հեղինակություն ունի Ամերիկայում և ապագայում կարող է օգնել իր բռնցքամարտիկներին առաջ շարժվելву, հեռուստատեսությամբ նրանց մենամարտերը ցուցադրելու գործում։ Միաժամանակ նա ընդգծեց, որ հայ բռնցքամարտիկների առջև դրվելու է պայման՝ մենամարտերից հետո վերադառնալ հայրենիք։

Չեմպիոնն ասաց, որ ծրագրում է դեռ 2-3 տարի բռնցքամարտով զբաղվել և փորձել այդ տարիների ընթացքում հավաքել որքան հնարավոր է շատ գոտիներ տարբեր քաշային կարգերում, սակայն բռնցքամարտիկի կարիերայի ավարտի վերջնական ժամկետը կախված կլինի նրա ֆիզիկական վիճակից։

Դարչինյանը նաև նշեց, որ իր մենամարտի անցկացման պայմանագրերի կնքման ժամանակ հրաժարվում է ավելի շահավետ ֆինանսական պայմաններից, որպեսզի ավելի շատ չեմպիոնական տիտղոսներ նվաճի։ Նա, կատակելով, ավելացրեց, որ այդ ֆինանսական զիջումները ներդրում է համարում իր փրոմութերական ապագայի մեջ։

Բռնցքամարտիկը նշեց, որ կցանկանար կատարել Երևանում մենամարտ անցկացնելու իր խոստումը, սակայն չեմպիոններից ոչ ոք չի ցանկանում այցելել Հայաստան, այդ պատճառով հայրենիքում նրա մենամարտը հետաձգվում է:

Վախթանգ (Վիկ) Դարչինյանն աշխարհի յոթակի չեմպիոն է, ունի WBC և WBO  վարկածներով առաջին գերթեթև քաշային կարգի, նաև IBO գերթեթև քաշային կարգի չեմպիոնի գոտիներ։ Պրոֆեսիոնալ ռինգում Դարչինյանը, ում «կատաղի ցուլ» են անվանում, 38 մրցապայքար է անցկացրել և 35 հաղթանակ տարել, այդ թվում 27-ը  նոկաուտով, երկու պարտություն է կրել, և ևս մեկ մենամարտ ավարտել է ոչ-ոքի։ -0-