Մայր Աթոռ Սուրբ Էջմիածնի տեղեկատվական համակարգը հայտարարություն է տարածել, որտեղ հերքվում է իրեն ուղղված մեղադրանքը, որը ԶԼՄ-ներում ներկայացվել է «Քրիստոնեական մշակութային միջազգային ծառայություններ» բարեգործական հասարակական կազմակերպության և Երևանի ավետարանական եկեղեցու ղեկավար Լևոն Պարտագճյանի կողմից։
Տեղեկատվական համակարգից հիշեցնում են, որ ավելի վաղ Պարտագճյանը հայտարարել էր այն մասին, որ Մայր Աթոռ Սուրբ Էջմիածինը խոչընդոտում է իր կազմակերպության կողմից իբրև թե բարեգործական նպատակներով «Նվերներ Հայաստանի երեխաներին» ծրագրով Հայաստան ներկրված տարբեր իրերի (հիգիենայի պարագաներ, գրենական պիտույքներ և այլն, նաև գործածված ու հնամաշ)` նվիրառուներին բաշխելու աշխատանքները:
Հայկական Եկեղեցին այդ մեղադրանքներն անհիմն է համարում և անհրաժեշտ է գտնում պարզաբանումներ տալ:
Հայտարարությունում նշվում է, որ 2009թ. նոյեմբերին 20-ին Լևոն Պարտագճյանը դիմել է ՀՀ Կառավարության Բարեգործական ծրագրերի համակարգման հանձնաժողովին` «Նվերներ Հայաստանի երեխաներին» ծրագիրը բարեգործական որակելու խնդրանքով:
Մայր Աթոռ Սուրբ Էջմիածինը, նկատի առնելով Պարտագճյանի կողմից սոցիալական աջակցության անվան ներքո իրականացվող կրոնական քարոզչությունը, հայտնել է իր վերապահությունը ծրագրի վերաբերյալ, որ «ծառայեցվում է Հայ Առաքելական Սուրբ Եկեղեցու հավատացյալների շրջանում հոգեորսության նպատակներով»:
«Մայր Աթոռ Սուրբ Էջմիածնի ներկայացուցիչը, կանխելու համար Պարտագճյանի` բարեգործության սկզբունքներին հակասող գործողությունները, առաջարկել է, որ ծրագիրն իրականացվի Եկեղեցիների համաշխարհային խորհրդի Կլոր սեղան միջեկեղեցական բարեգործական հիմնադրամի միջոցով»,- ասվում է հաղորդագրությունում։
Միաժամանակ, ինչպես նշեցին տեղեկատվական համակարգից, առաջարկին իր համաձայնությունն է տվել պատվելի Պարտագճյանը, արտերկրյա դոնոր կազմակերպությունները և Կլոր Սեղանի հոգաբարձուների խորհուրդը, որի կազմում են Հայ Առաքելական Սուրբ Եկեղեցու, այնպես և Կաթոլիկ և Ավետարանական եկեղեցիների ներկայացուցիչները:
«Հետագային Պարտագճյանը, դրժելով իր իսկ հանձնառությունը, հրաժարվել է, որ Կլոր սեղան բարեգործական հիմնադրամն իրականացնի ծրագիրը»,- ասվում է հաղորդագրությունում։
Ժամանակ անց ԲԾՀՀ-ն հետ է կանչել ծրագիրը բարեգործական որակելու իր որոշումը: -0-
