Թուրք-իսրայելական ճգնաժամը հազիվ թե Իսրայելի կողմից Հայոց ցեղասպանության ճանաչման հանգեցնի. փորձագետ

Թուրք-իսրայելական ճգնաժամը, որը սկիզբ է առել «Ազատության նավատորմի» հետ  կապված միջադեպով, հազիվ թե Իսրայելի կողմից Հայոց ցեղասպանության ճանաչման հանգեցնի, այդ կարծիքին է Կովկասի ինստիտուտի Քաղաքագիտության բաժնի ղեկավար, փոխտնօրեն Սերգեյ Մինասյանը։

Իսրայելի ՌԾՈՒ-ն երկուշաբթի գիշերը վեց արտասահմանյան նավերից բաղկացած  «Ազատության նավատորմի» գրավման գործողություն է իրականացրել. նավերը   Գազայի արգելափակված հատված ավելի քան 600 իրավապաշտպանների և շուրջ 10 հազար տոննա հումանիտոր բեռ էին տանում։

Գործողության ժամանակ առաքելության ինը անդամ զոհվել է, տասնյակները վիրավորվել են, հարյուրավորները հայտնվել են բանտում։ Վիրավորվել են նաև յոթ իսրայելացի զինվորներ, ովքեր բախվել են նավարկության մասնակիցների դաժան դիմադրությանը։

«Իսրայելի համար, ինչպես նաև ԱՄՆ-ի համար, ցեղասպանության խնդիրը Թուրքիայի վրա ճնշում գործադրելու չափազանց կարևոր և լուրջ ռեսուրս է , կարելի է ասել «ոսկե փամփուշտ» է, որն Իսրայելը դժվար թե որոշի կիրառել Թուրքիայի դեմ»,- հինգշաբթի մամուլի ասուլիսի ժամանակ նշեց Մինասյանը։

Ըստ նրա՝ Իսրայելը բացի ցեղասպանության ճանաչումից Թուրքիայի վրա ճնշման բավականին այլ լծակներ ունի։

Միաժամանակ Մինասյանը, այդուհանդերձ, չբացառեց, որ Իսրայելում ակտիվանում են Հայոց ցեղասպանության ճանաչման հարցի շուրջ քննարկումներնն ի պատասխան Թուրքիայի կարծր հայտարարությունների։--0--