Ղարաբաղի հարցով Եվրախորհրդարանի բանաձևը ՀՀ ԱԳՆ ոչ պրոֆեսիոնալության արդյունքն է. Դեմկուս

Լեռնային Ղարաբաղի հարցով Եվրախորհրդարանի բանաձևը հայկական արտաքին քաղաքական գերատեսչության ոչ պրոֆեսիոնալ աշխատանքի հերթական արդյունքն է, ասաց Հայաստանի Դեմոկրատական կուսակցության առաջնորդ Արամ Սարգսյանը։

Եվրախորհրդարանը մայիսի 20-ին բանաձև է ընդունել Հարավային Կովկասում հակամարտությունների կարգավորման վերաբերյալ, որը պատրաստել է բուլղարացի խորհրդարանական Եվգենի Կիրիլովը։ Փաստաթղթում ասվում է, որ Ղարաբաղը պետք է ուժերը դուրս բերի «Ադրբեջանի բոլոր բռնազավթված տարածքներից»։

«Նման փաստաթղթերը հակահայկական դավադրություն որակավորելու փոխարեն հարկ է պատճառներն իրենց մեջ փնտրեն։ Ադրբեջանն ու Թուրքիան արդեն 20 տարի տանդեմով են հանդես գալիս, և մենք վաղուց պետք է այդ տենդեմի հակազդեցության հայեցակարգային ծրագիր մշակած լինեինք»,- հինգշաբթի մամուլի ասուլիսի ժամանակ ընդգծեց Դեմկուսի առաջնորդը։

Նա նշեց, որ հայկական կողմն ընդդիմախոսներին մեղադրում է նրանում, որ նրանք միջազգային կազմակերպություններում տարբեր բանաձևեր են առաջադրում, բայց  ինքը ոչ մի փաստաթուղթ չի ներկայացրել, որը կարտացոլեր հակամարտության էությունն ու հայկական դիրքորոշումը։

«Հայկական ԱԳՆ պետք է առավել ակտիվ լինել այդ գործընթացում։ Մեր դեսպանները վատ են աշխատում, և դա նույնպես ԱԳՆ մեղքն է։ Տեղեկատվական պատերազմների դարում շատ կարևոր է, թե ինչպես մենք կներկայանանք աշխարհին»,- ավելացրեց Սարգսյանը։

Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից  դուրս գալու մասին։

1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։

Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։

1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։ Պատերազմի  հետևանքով երկու կողմից զոհվեց մոտավորապես 25-30 հազ մարդ և մոտ  մեկ միլիոնը ստիպված եղավ լքել  բնակավայրերը։

Զինադադարի ռեժիմի մասին համաձայնությունը պահպանվում է մինչ այժմ։

1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան։-0-