Առաջին անգամ Հայաստանում հունիսի 2-22-ը կանցկացվի մեծ հայ երաժիշտներ Հենրի և Հերոնտի Թալալյաններին նվիրված «Ալտ և թավջութակ» հանրապետական երաժշտական փառատոնը, ասաց «Արվեստների պատկերասրահ» մշակութային հիմնադրամի նախագահ Մարիամ Շահինյանը։
«Հենրի և Հերոնտի Թալալյանները եղբայրներ են, որոնցից մեկը՝ Հենրի Թալալյանը մեծ ալտիստ էր, իսկ Հերոնտին՝ թավջութակահար։ Նրանք ալտի և թավջութակի հսկայական դպրոց են թողել հայկական արվեստում, և նման հսկայական դպրոց ունենալով՝ այսօր մենք մի խնդրի առջև ենք կանգնած, երբ մեր երաժշտական դպրոցներում այս երկու գործիքների նկատմամբ հետաքրքրությունը նվազում է»,- չորեքշաբթի մամուլի ասուլիսի ժամանակ ասաց Շահինյանը։
Ըստ նրա՝ փառատոնը կանցկացվի ոչ միայն Երևանում, այլև Չարենցավան և Գավառ քաղաքներում։
Փառատոնի մասնակիցները հիմնականում երիտասարդ հայ երաժիշտներն են՝ «Ars Lunga» դուետը (թավջութակ և դաշնամուր), Յանա Դուրյան (ալտ), Արմեն Թորոսյան (ալտ), Լիլիթ Մխիթարյան (ալտ), Մարի Դոլմազյան (ալտ), Նունե Ասատրյան (դաշնամուր), Արթուր Ավանեսով (դաշնամուր), Կարինե Էլչյան-Մովսիսյան (դաշնամուր), Լուսինե Հակոբյան (դաշնամուր), Գայանե Խաչատրյան (թավջութակ)։
Փառատոնին կհնչեն համաշխարհային կոմպոզիտորների, մասնավորապես, Շտրաուսի, Վեբերի, Պիացոլլայի, Բախի, ինչպես նաև հայ հոբելյար կոմպոզիտորներ Գագիկ Հովունցի, Էդգար Հովհաննիսյանի, Ղազարոս Սարյանի, Ալեքսանդր Հարությունյանի ստեղծագործությունները։
Այդ կապակցությամբ թավջութակահար Արամ Թալալյանը նշեց, որ Հայաստանի բոլոր մարզերից թավջութակի դասարան գոյություն ունի միայն Կոտայքի մարզում և ընդգծեց, որ փառատոնի շրջանակներում մարզերի երաժշտական դպրոցներում ալտի և թավջութակի վարպետության դասեր կանցկացվեն։
«Մարզերի հետ կապված բազում տեխնիկական հարցեր կան։ Մենք ֆինանսական միջոցների պակասի և ալտի ու թավջութակի մասնագետների բացակայության առջև ենք կանգնած»,- ասաց Թալալյանը։
Իր հերթին ՀՀ մշակույթի նախարարության հասարակության հետ կապերի բաժնի ղեկավար Գայանե Դուրգարյանը նշեց, որ արդեն երկրորդ տարին է, որ նախարարությունը Հայաստանի մարզերի օժտված երեխաներին պետպատվեր է տրրամադրել ալտ և թավջութակ ուսանելու համար ։ -0-
