«Ազգային պատկերասրահ» փառատոնը կեզրափակի «Ի նշան երախտագիտության համերգը»
«Ի նշան երախտագիտության համերգը», որը նվիրված է մեծ հայ կոմպոզիտորներ Ալեքսանդր Հարությունյանի, Ղազարոս Սարյանի, Էդգար Հովհաննիսյանի և Գագիկ Հովունցի հոբելյաններին, կնշանավորի Երևանում «Ազգային պատկերասրահ» վեցերորդ երաժշտական փառատոնի եզրափակումը, հայտնեց «Արվեստների պատկերասրահ» մշակութային հիմնադրամի նախագահ Մարիամ Շահինյանը։
«Ազգային պատկերասրահ» վեցերորդ երաժշտական փառատոնը տեղի ունեցավ 2010թ.-ի ապրիլի 21-ից մինչև հունիսի 2-ը։ Փառատոնի շրջանակներում ելույթ են ունեցել Հայաստանի Պետական երիտասարդական անսամբլը, Հայաստանի Պետական կամերային երգչախումբը, «Դոմինատուս Վոկս» անսամբլը, Հայաստանի ժողովրդական արտիստուհի, դաշնակահարուհի Սվետլանա Նավասարդյանը, «Կլարիպիանո» դուետը Սլովենիայից, շվեդ ջութակահար Հյուգո Տիչիատին և Ռուսաստանից դաշնակահար Եվգենի Միխայլովը։
«Փառատոնի շրջանակներում յոթ համերգ էր ծրագրված, որոնք արդեն կայացել են։ Իսկ այս համերգը ութերորդը կլինի, որով մենք հանդիսավոր կերպով եզրափակում ենք այս փառատոնը և բացում ալտի և թավջութակի փառատոնը։ Այդ մտահաղացումը մեծ գաղափարախոսություն ունի. մենք արդեն կայացած հանդիսատես ունենք, և այդ հանդիսատեսը միշտ նոր ծրագրերի է սպասում»,- չորեքշաբթի լրագրողներին ասաց Շահինյանը։
Հիմնադրամի նախագահը նշեց, որ «Ի նշան երախտագիտության համերգի» շրջանակներում կհնչեն չորս հոբելյար կոմպոզիտորների ստեղծագործությունները, ինչպես նաև փառատոնի գեղարվեստական խորհրդի անդամ, կոմպոզիտոր Երվանդ Երկանյանի ստեղծագործությունները։
Իր հերթին թավջութակահար Արամ Թալալյանն ընդգծեց, որ Հայաստանում երբեք դասական երաժշտության ունկնդրի պակաս չի եղել։ «Մեր երկրում մեծ գործոն է համարվում գրագետ գովազդը։ Կարելի է ցանկացած դահլիճ լցնել»,- ավելացրեց Թալալյանը։
«Ազգային պատկերասրահ» վեցերորդ երաժշտական փառատոնն անցկացվում է ՀՀ մշակույթի նախարարության աջակցությամբ։ -0-
