Ռինոպլաստիկան (քթի ձևի շտկում) աառջին տեղն է զբաղեցնում Հայաստանում իրականացվող պլաստիկ վիրահատությունների շարքում, չորեքշաբթի լրագրողներին ասաց Քանաքեռ-Զեյթուն բժշկական կենտրոնի պլաստիկ վիրաբուժության բաժանմունքի պետ Կարեն Դանիելյանը։
Ըստ նրա՝ Հայաստանում իրականացվող չորս վիրահատությունից երեքը կապված են քթի ձևի շտկման հետ։ Միաժամանակ ներկայումս քթի շտկում իրականացնել ցանկացողների 75 տոկոսը կանայք են, սակայն աճում է նաև տղամարդկանց տոկոսային հարաբերակցությունը։
Իր հերթին, «Նաիրի» բուժկենտրոնի պլաստիկ վիրաբույժ Աշոտ Ղազարյանը նշեց, որ երկրորդ տեղը կանանց շրջանում կրծքի պլաստիկան է՝ աուգմենտացիան (սիլիկոնային իմպլանտներով կրծքի պրոթեզավորումը, ձգումն ու չափերի փոքրացումը):
«Պլաստիկ վիրահատությունների թվում տղամարդկանց շրջանում երկրորղ տեղում է որովայնի շրջանի լիպոսակցիան», - նշել է Ղազարյանը:
Նրա խոսքերով՝ երրորդ տեղում է ուրվագծային պլաստիկան (բոտոքս, ֆիլեր), որը վիրաբուժական միջամտություն չէ, սակայն լավ արդյունքներ է տալիս:
Ղազարյանը տեղեկացրեց, որ Հայաստանում պլաստիկ վիրահատությունների թիվը 2010 թ.-ին 2009 թ.-ի համեմատ աճել է երեք անգամ: Միաժամանակ նա չհրապարակեց կոնկրետ թվեր՝ նշելով, որ նման վիրահատություններ անցկացվում են հազարներով:-0-
