Թուրք-իսրայելական հարաբերությունների սրացումը կարող է բերել Իսրայելի Քնեսեթում Հայոց ցեղասպանության հարցի քննարկումների ակտիվացմանը, կարծում է թուրքագետ Ռուբեն Մելքոնյանը։
Իսրայելի հատուկ նշանակության ջոկատը նախորդ գիշեր օպերացիա է իրականացրել վեց նավերից բաղկացած «Ազատության նավատորմի» զավթման ուղղությամբ, նավատորմի կազմում մարդասիրական բեռի հետ միասին շրջափակված պաղեստինական անկլավ էին մեկնում նվազագույնը 600 իրավապաշտպաններ, որոնց մեծամասնությունը Թուրքիայի քաղաքացիներ էին։ Համաշխարհային ԶԼՄ-ների տվյալներով՝ այս պահին իսրայելական հատուկ օպերացիայի զոհերի թիվը հասել է 19 մարդու։ Իսրայելցիները հաստատում են ինը մարդու մահը։
«Եթե նույնիսկ Հայաստանը ինչ-որ բան շահի ներկա իրավիճակից, ապա դա մակերեսային կլինի, օրինակ՝ Քնեսեթում կարող է ակտիվացվել Հայոց ցեղասպանության հարցի քննարկումը, իսկ Իսրայելը կարող է ավելի չեզոք դիրք զբաղեցնել Ցեղասպանության միջազգային ճանաչման գործընթացում։ Սակայն այդ ամենը մակերեսային կլինի և չի հանգեցնի խորը տեղաշարժերի», - երեքշաբթի մամուլի ասուլիսի ժամանակ նշել է Մելքոնյանը։
Նրա խոսքերով՝ հայությունը չպետք է նման կերպ լրջորեն ընկալի թուրք-իսրայելական հարաբերությունների սրացումը և հաշվարկի իր շահումը հնարավոր պառակտումից, որը հիմա այդքան էլ հավանական չէ։
Մելքոնյանը հիշեցրել է, որ թուրք-իսրայելական համագործակցությունը որոշակի կետերում կրում է հակահայկական բնույթ, ինչը նկատվում է Հայոց ցեղասպանության ճանաչման գործընթացում։
Թուրքագետի կարծիքով՝ թուրք-իսրայելական կապերն ու ռազմավարական համագործակցությունը Իսրայելի համար միշտ ավելի մեծ առաջնահերթություն կլինեն, քան Հայաստանի հետ կապերը, իսկ Ցեղասպանության հարցը Իսրայելի համար միշտ քաղաքական սակարկության գործիք կլինի։
Հայոց Ցեղասպանությունը ХХ դարի առաջին ցեղասպանությունն է։ Թուրքիան ավանդաբար մերժում է Առաջին համաշխարհային պատերազմի տարիներին մոտ մեկուկես միլիոն հայերի զանգվածային ջարդեր իրականացնելու մեղադրանքները և չափազանց ցավագին է վերաբերվում Հայոց Ցեղասպանության հարցի վերաբերյալ Արևմուտքի կողմից արվող քննադատություններին։
Հայոց ցեղասպանության փաստը ճանաչել են բազմաթիվ երկրներ, մասնավորապես, Ուրուգվայը, Ռուսաստանը, Ֆրանսիան, Լիտվան, Իտալիայի խորհրդարանի ստորին պալատը, ԱՄՆ-ի նահանգների մեծամասնությունը։ Հայոց ցեղասպանության զոհերի հիշատակի օրը նշվում է ապրիլի 24-ին։-0-
