ՌԴ Պետդումայի նախագահ Բորիս Գռիզլովը կարծում է , որ այսօր Լեռնային Ղարաբաղում իրավիճակի կարգավորման անհրաժեշտ որոշումներ ընդունելու համար հեռանկարներ կան։
«Կարող եմ ասել, որ այժմ բավականին հստակ և հասկանալի քայլեր են նշմարվում, և հեռանկար կա, որ մոտակա ժամանակներս այդ իրավիճակի կարգավորման համար անհրաժեշտ որոշումներ կընդունվեն։ Եկեք սահմանափակվենք իմ հենց նման պատասխանով՝ առանց մանրամասների, քանի որ իրավիճակը շատ զգայուն է»,- երկուշաբթի Երևանում լրագրողներին ասաց Գռիզլովը։
Գռիզլովը գտնվում է Հայաստանի մայրաքաղաքում ՀԱՊԿ Խորհրդարանական Վեհաժողովի խորհրդի արտագնա նիստին մասնակացելու համար։
Նա հիշեցրեց, որ Ադրբեջանի և Հայաստանի ղեկավարությունների միջև՝ միջնորդների և առաջին հերթին Ռուսաստանի Դաշնության մասնակցությամբ, բանակցություններ են տարվում։
«Կարող եմ ասել, որ այս բանակցությունները, որոնք, բնականաբար, վերաբերվում են նաև Լեռնային Ղարաբաղի կարգավիճակին և Լեռնային Ղարաբաղի հարակից տարածքներին, առաջ են ընթանում»,- նշեց ՌԴ Պետդումայի նախագահը։
Նա նշեց, որ բավականին շատ ժամանակ է տրամադրվում այդ իրավիճակին ծանոթանալուն, և պատմական ժամանակահատվածում, երբ ՌԴ ներքին գործերի նախարար էր, նույնպես հետևել է իրավիճակին։
Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին։
1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։
Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։
1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։ Պատերազմի հետևանքով երկու կողմից զոհվեց մոտավորապես 25-30 հազ մարդ և մոտ մեկ միլիոնը ստիպված եղավ լքել բնակավայրերը։
Զինադադարի ռեժիմի մասին համաձայնությունը պահպանվում է մինչ այժմ։
1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան։-0-
