Ադրբեջանում ռուս պատգամավորներին պերսոնա նոն-գրատա հայտարարելը Բաքվի նյարդայնության նշանն է. փորձագետ
Ադրբեջանում ռուս պատգամավորներին պերսոնա նոն-գրատա հայտարարելը վկայում է այդ երկրի քաղաքական ղեկավարության նյարդայնության մասին, կարծում է հայ քաղաքագետ, Կովկասի ինստիտուտի տնօրեն Ալեքսանդր Իսկանդարյանը:
Ադրբեջանի արտգործնախարարությունը պերսոնա նոն-գրատա է հայտարարել ՌԴ Պետդումայի հինգ պատգամավորների՝ Կոնստանտին Զատուլինին, Իգոր Չեռնիշենկոյին, Կիրիլ Չերկասովին, Տատյանա Վոլոժինսկայային և Մաքսիմ Միշչենկոյին՝ մայիսի 23-ին Լեռնային Ղարաբաղի Հանրապետությունում կայացած խորհրդարանական ընտրությունները մոնիտորինգի ենթարկելու համար: Այս ցանկում են հայտնվել նաև Պետդումային առընթեր ռուսանողական խորհրդարանի անդամ, միջազգային դիտորդ Գալինա Ռատնիկովան, հասարակական-քաղաքական գործիչ Վիկտոր Շեյնիսը, Ռազմավարական մշակույթի հիմնադրամի փորձագետ Անդրեյ Արեշևը: Ցանկում են ընդգրկված նաև Ֆրանսիայի, Գերմանիայի, Արգենտինայի, Իրանի և մի շարք այլ երկրների քաղաքացիներ:
«Լեռնային Ղարաբաղում կայացած ընտրությունների նկատմամբ Ադրբեջանի արձագանքն այս անգամ շատ կտրուկ էր: Իհարկե, պետք էր ակնկալել այդ ընտրությունների արդյունքների հերթապահ չճանաչումը և այն, որ Ադրբեջանը հերթական անգամ պետք է անօրինական համարեր այն ամենը, ինչ կատարվում է չճանաչված հանրապետությունում: Սակայն Ռուսաստանի, մի երկրի, որի հետ հարաբերությունները Ադրբեջանի համար դժվար է գերագնահատել, խորհրդարանի հինգ պատգամավորներին պերսոնա նոն-գրատա հայտարարելը մատնանշում է այդ երկրի քաղաքական ղեկավարության լուրջ նյարդայնությունը», - ասել է Իսկանդարյանը:
Նրա խոսքերով՝ Ադրբեջանի ԱԳՆ մամուլի քարտուղար Պոլուխովի հայտարարությունն այն մասին, որ եթե պատգամավորները ճանաչեն «չարամիտ դիտավորության» բացակայությունը, ապա Ադրբեջան այցելելու արգելքը կարող է չեղյալ համարվել, կասկած է հարուցում նույնիսկ նվազագույն քաղաքական և պաշտոնական նպատակահարմարության առկայության մասին:
«Նմանատիպ հայտարարություններն այն տեղեկատվությունների հետ միասին, թե ապագա պերսոնա նոն-գրատաների ցանկը ճշտվում է, չի կարող պատահականության լինել և չի կարող բացատրվել պաշտոնյաների զուտ ոչ պրոֆեսիոնալ լինելով: Ղարաբաղում ընտրություններն անցկացվում են արդեն հինգերորդ անգամ: Այդ ընտրություններին միշտ դիտորդներ են մասնակցել, մասնավորապես՝ Կոնստանտին Զատուլինը դիտորդի կարգավիճակ ուներ նաև նախորդ խորհրդարանական ընտրությունների ժամանակ», - նշել է փորձագետը:
Նրա խոսքերով՝ գրգռվածության ցուցադրումը, իհարկե, կապված է դիտորդների թվի հետ, նրանք, իսկապես, քիչ չէին՝ տասը երկիր ներկայացնող հարյուրից ավելի դիտորդ: «Բացի այդ, Ադրբեջանի համար ընդունելի ձևով ղարաբաղյան խնդիրը լուծելու ակնհայտ անհնարինությունը, դե-ֆակտո պետության գոյության անշրջելիության զգացումը հանգեցնում է նմանատիպ զգացմունքների ցուցադրման», - կարծում է փորձագետը:
Նրա խոսքերով՝ «կամ արագ, հաղթական պատերազմի կամ սովից Ղարաբաղի բնակչության ոչնչացման միջոցով, կամ էլ միջազգայյին ճշնման հիման վրա» խնդրի շուտափույթ և վերջնական լուծման հեռանկարով սեփական բնակչությանը բազմաթիվ տարիներ հանգստացնելը ժամանակի ընթացքում դադարում է համոզիչ լինել»:
«Կանոնավոր կերպով կրկնվող ընտրությունները հիշեցնում են այդ իրողության մասին, ինչը նյարդայնություն է առաջացնում՝ հաճախ նույնիսկ չռեֆլեքսավորվող», - նշել է Իսկանդարյանը:-0-
