Եվրաինտեգրումը մնում է Հայաստանի արտաքին քաղաքականության գերակա ուղղություններից մեկը. Սարգսյան
Եվրաինտեգրումը եղել և մնում է Հայաստանի արտաքին քաղաքականության գերակա ուղղություններից մեկը, հինգշաբթի Եվրոպական հանձնաժողովի փոխնախագահ, ԵՄ արտաքին հարաբերությունների և անվտանգության հարցերով բարձր ներկայացուցիչ Քեթրին Էշթոնի հետ հանդիպման ժամանակ ասաց ՀՀ նախագահ Սերժ Սարգսյանը:
«Հանդիպման ժամանակ կողմերը խոսել են Արևելյան գործընկերության ծրագրի ընձեռած նոր հնարավորությունների մասին»,- հաղորդում է հայկական պետության ղեկավարի մամուլի ծառայությունը:
«Զրուցակիցներն ընդգծել են, որ Արևելյան գործընկերության ձևաչափը նաև Կովկասի երկրների միջև համագործակցությունը խթանելու, կայունություն և համերաշխություն հաստատելու արդյունավետ միջոց է»,- նշվում է հաղորդագրությունում:
Հանդիպման ժամանակ քննարկվել են նաև Հայաստան-ԵՄ ասոցացման և ազատ առևտրի համաձայնագրերի ստորագրման, ՀՀ քաղաքացիների համար ԵՄ երկրներ մուտքի արտոնագրերի տրամադրման գործընթացի պարզեցմանն առնչվող հարցեր:
Զրուցակիցները քննարկել են նաև Հայաստան-Թուրքիա հարաբերությունների կարգավորմանն և ԼՂ բանակցային գործընթացին առնչվող հարցեր:-0-
