ԵՐԵՎԱՆ, 27 մայիսի. /Նովոստի-Արմենիա/. Ղարաբաղյան հարցում փոխզիջումները չեն ենթադրում տարածքների վերադարձ Ադրբեջանին, հինգշաբթի մամուլի ասուլիսում հայտարարեց Հայաստանի Հանրապետական կուսակցության փոխնախագահ, խորհրդարանի պատգամավոր Ռազմիկ Զոհրաբյանը։
«Երբ խոսվում է փոխզիջումների մասին, խոսքն Ադրբեջանին Ղարաբաղի ազատագրված տարածքների վերադարձի մասին չէ, չէ՞ որ մենք ներկայումս ունենք տարածքներ, որոնք Ադրբեջանի կազմում են, օրինակ, Գետաշենը, Շահումյանը, Մարտակերտի տարածքի մի մասը և Մարտունին»,- ասաց Զոհրաբյանը։
Ըստ նրա, Հայաստանի դիրքորոշումը ղարաբաղյան հարցում հստակ է՝ «մինչև չճանաչվի Ղարաբաղի անկախ կարգավիճակն, այդ տարածքները չեն կարող քննարկման առարկա դառնալ»։
«Եթե Ադրբեջանը չի պատրաստվում ճանաչել Ղարաբաղի ինքնորոշման իրավունքն, ապա տարածքների վերադարձի թեման ավելորդ է»,- ընդգծեց ՀՀԿ փոխնախագահը։
Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին։
1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։
Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։
1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։ Պատերազմի հետևանքով երկու կողմից զոհվեց մոտավորապես 25-30 հազ մարդ և մոտ մեկ միլիոնը ստիպված եղավ լքել բնակավայրերը։
Զինադադարի ռեժիմի մասին համաձայնությունը պահպանվում է մինչ այժմ։
1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան։-0-
