Հայերն ամբողջ աշխարհում շարունակում են Արևմուտքի և Արևելքի մշակույթները կամրջելու իրենց առաքելությունը, հինգշաբթի «Վիլա Էմպեն» Արևմուտքի և Արևելքի մշակույթի կենտրոնում ասաց ՀՀ նախագահ Սերժ Սարգսյանը:
«Մեր բարդ ժամանակներում, երբ հակամարտություններին փորձում են տալ կրոնական երանգավորում և խոսել քաղաքակրթությունների առճակատման մասին, մենք` հայերս, պետք է գործուն կերպով շարունակենք տարբեր մշակույթները կամրջելու մեր առաքելությունը»,- ասաց նախագահը:
Սարգսյանն ավելացրեց, որ հայերը՝ որպես աշխարհով մեկ սփռված ազգ, շատ լավ են հասկանում ուրիշի կրոնի, լեզվի, մշակույթի հանդեպ հարգանքի անհրաժեշտությունը:
Նա նաև նշեց, որ ցեղասպանությունից հետո, որն իրագործվել էր հայերի հանդեպ Օսմանյան կայսրությունում, չի կարելի ասել, թե ով ավելի լավ ընդունեց հայ փախստականներին՝ քրիստոնեակա՞ն, թե՞ մուսուլմանական երկրները:
«Այն օգնությունը, որը ցուցաբերվեց մեր ազգի համար այդ բարդ ժամանակահատվածում, գնահատականի կամ համեմատության չի ենթարկվում»,- ընդգծեց Սարգսյանը:
Իր ելույթի ժամանակ նախագահը նաև իր երախտագիտությունը հայնտեց բարեգործներ Ժան և Ալբեր Պողոսյաններին, ում բարեգործական հիմնադրամը օգնեց «Վիլա Էմպեն» Արևմուտքի և Արևելքի մշակույթի և երկխոսության կենտրոնի վերականգնմանը:
Նա ընդգծեց, որ այսօր այդ կենտրոնը շարունակում է իր հիմնադիր բարոն Լուի Ամպպենի գործը, ով հիմնադրել է մշակույթի և արվեստի օջախը, և ծառայում է Արևմուտքի և Արևելքի մշակույթների միջև կապի ամրացմանը:
1915-1923 թթ. Հայոց ցեղասպանությունը XX դարի առաջին ցեղասպանությունն է, որը կազմակերպել և ծրագրված իրականացրել է երիտթուրքական կառավարությունը։ 1915-1923 թթ.-ին Թուրքիայում Հայոց ցեղասպանության փաստի ճանաչումը սկզբունքային նշանակություն ունի հայ ժողովրդի համար, քանի որ Ցեղասպանությունն իրականացվել է՝ Հայկական հարցը փակելու նպատակով։
Հայոց ցեղասպանության փաստը ճանաչել են բազմաթիվ երկրներ, մասնավորապես, Ուրուգվայը, Լիտվան, Ռուսաստանը, Ֆրանսիան, Իտալիայի խորհրդարանի ստորին պալատը, Գերմանիան, Հոլանդիան, Սլովակիան, Շվեդիան, Շվեյցարիան, ԱՄՆ 42 նահանգներ, ինչպես նաև Հունաստանի, Կիպրոսի, Արգենտինայի, Բելգիայի, Ուելսի խորհրդարանները, Կանադայի խորհրդարանի համայնքների պալատը և Լեհաստանի սեյմը, Վատիկանը, Եվրախորհդարանը, Եկեղեցիների համաշխարհային խորհուրդը։ -0-
