ՀՀ ռազմական ոստիկանության Արմավիրի կառույցի ղեկավարը ազատվել է աշխատանքից լրագրողներին սպառնալու պատճառով

ՀՀ ռազմական ոստիկանության Արմավիրի կառույցի ղեկավար Գրիշա Սարգսյանը հեռացվել է զբաղեցրած պաշտոնից, գրում է «Չորրորդ ինքնիշխանություն» ընդդիմադիր թերթը:

Ըստ թերթի, Սարգսյանի հեռացման հիմնական պատճառն այն է, որ «Չորրորդ ինքնիշխանություն» թերթում իր մասին տպագրված հոդվածից հետո նա զանգահարել է խմբագրություն և սպառնացել հոդվածի հեղինակներին:

Երբ թերթը պաշտոնապես դրա մասին հայտարարել է ոստիկանություն, ՀՀ ՊՆ Ռազմական ոստիկանության վարչության պետ Վլադիմիր Գասպարյանը իր մոտ է կանչել Սարգսյանին և ստիպել է թոշակի անցնելու մասին դիմում գրել: Սարգսյանի նկատմամբ նշանակվել է նաև ծառայողական քննություն:

Սարգսյանին Արմավիրի կառույցում արդեն փոխարինել է Ռուբեն Ներսիսյանը, ում թեկնածությունը ներկայացրել է ՀՀ ՊՆ ռազմական ոստիկանության վարչության պետի առաջին տեղակալ, գնդապետ Հայկ Ստեփանյանը: -0-