ՆԱՏՕ-ի գլխավոր քարտուղար Անդերս Ֆոն Ռասմուսենը երեքշաբթի Բրյուսելում ՀՀ նախագահ Սերժ Սարգսյանի հետ տեղի ունեցած համատեղ մամուլի ասուլիսի ընթացքում հայտարարել է, որ ղարաբաղյան հակամարտության գոտում ռազմական դիմակայություն չի կանխատեսում, հաղորդում է Հայաստանի հանրային հեռուստաընկերությունը (ՀՀՀ):
«Պատասխանելով այն հարցին, թե ի՞նչ կանի ՆԱՏՕ-ն ադրբեջանական ագրեսիայի դեպքում, Ռասմուսենը նշել է, որ տարածաշրջանում ռազմական դիմակայություն չի կանխատեսում», - հաղորդում է ՀՀՀ-ն:
Ռասմուսենը նաև հայտարարել է, որ ՆԱՏՕ-ն ներգրավված չէ հակամարտության մեջ, սակայն աջակցում է ԵԱՀԿ Մինսկի խմբի ջանքերին և կոչ է անում իր գործընկերներ Հայաստանին և Ադրբեջանին շարունակել խաղաղ բանակցությունները:
Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին։
1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։
Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։
1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։ Պատերազմի հետևանքով երկու կողմից զոհվեց մոտավորապես 25-30 հազ մարդ և մոտ մեկ միլիոնը ստիպված եղավ լքել բնակավայրերը։
Զինադադարի ռեժիմի մասին համաձայնությունը պահպանվում է մինչ այժմ։
1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան։-0-
