Հայաստանի Հանրապետության Զինված ուժեր զորակոչվելու պլանը գերակատարված է, երեքշաբթի լրագրողներին հայտնեց ՀՀ պաշտպանության նախարար Սեյրան Օհանյանը:
«Այսօրվա դրությամբ զորակոչը ոչ միայն կատարված է, այլև գերակատարված: Վերջին տարիներին մենք զորակոչի պլանը գերակատարում ենք»,- ասաց Օհանյանը:
Պաշտպանության նախարար Սեյրան Օհանյանն ու առողջապահության նախարար Հարություն Քուշկյանն այցելել են Կենտրոնական զինվորական հավաքակետ՝ մայիսի 10-ին մեկնարկած զորակոչի ընթացքին ծանոթանալու նպատակով: Նախարարները շփվեցին զինակոչիկների, հանձնաժողովի բժիշկների ու հավաքակետի անձնակազմի հետ: Այնուհետև պաշտպանության նախարարը հանդիպեց զինակոչիկների ծնողներին ու պատասխանեց նրանց հուզող հարցերին:
Օհանյանի խոսքով, նաև բարձրանում է զորակոչերի որակը: Նա նշեց, որ ՀՀ քաղաքացիները ծառայելու հարցին բավականին պատասխանատվությամբ են մոտենում:
« Շատ վայրերում տոնակատարություններ են կազմակերպվում բանակ ճանապարհելու պատվին, ինչը ողջունելի է մեր կողմից: Այս իրավիճակում և այս տարածաշրջանում գտնվելով՝ մենք պետք է լրջորեն վերաբերվենք երկրի պաշտպանության հարցերին»,- ասաց նախարարը:
«Մենք պայմանավորվել ենք պաշտպանության նախարարի հետ, որ նման այցերը մշտական բնույթ կկրեն: Մենք մի նպատակ ունենք՝ բժշկական հետազոտություն անցկացնել ամենաբարձր մակարդակով և լուծել առկա խնդիրը: Մենք առաջընթաց ունենք, որը հաստատեցին բժիշկները»,- իր հերթին ասաց Քուշկյանը:-0-
