Հայաստանը մի շարք գիտական նախագծեր կներկայացնի ԱՊՀ անդամ երկրների նորարարական համագործակցության միջպետական նպատակային ծրագրի նախապատրաստման աշխատանքային խմբի նիստում, ասաց էկոնոմիկայի նախարարության բարձր և տեղեկատվական տեխնոլոգիաների վարչության պետ Վաչե Կիրակոսյանը։
ԱՊՀ երկրների կառավարությունների ղեկավարների խորհրդի որոշմամբ ստեղծված աշխատանքային խմբի երկօրյա հինգերորդ նիստը բացվեց երեքշաբթի Երևանում։
«Դեռևս վաղ է ասել, թե որ նախագծերը կհաստատվեն, սակայն ծրագրի շրջանակներում Հայաստանը մի շարք գիտական նախագծեր կներկայացնի, այդ թվում՝ նանոտեխնոլոգիաների, ինչպես նաև տեխնոլոգիական կրթության ոլորտում»,- ասաց Կիրակոսյանը՝ նշելով, որ ծրագրի գոյության սկզբից Հայաստանը ներկայացրել է ավելի քան 30 ծրագիր։
ԱՊՀ գործադիր կոմիտեի փոխնախագահ Եվգենի Նովոժիլովի խոսքերով՝ ծրագրին մասնակցում է ԱՊՀ յոթ անդամ երկիր, և Հայաստանը միակ անդամ-երկիրն է հարավկովկասյան տարածաշրջանից։
«Ծրագրի նպատակն է համագործակցություն սկսել ԱՊՀ երկրների միջև նրանց գիտական արտադրանքի իրացման համար, քանի որ ԱՊՀ երկրների մեծամասնությունը համապատասխան շուկա չունի դրա համար»,- ասաց Հայաստանի գիտության պետական կոմիտեի նախագահ, պրոֆեսոր Սամվել Հարությունյանը։
Հարությունյանի խոսքերով՝ նկատի առնելով Հայաստանի մեծ գիտական ներուժը, բացի համագործակցությունից տվյալ ծրագիրը լայն հնարավորություններ է բացում, մասնավորապես, գիտական արտադրանքի, մշակումների իրացման տեսանկյունից։
«Ներկայումս իմ ձեռքի տակ ավելի քան 30 նախագիծ կա, որոնք կարող են լայնորեն կիրառվել նանոտեխնոլոգիաների, քիմիայի, ճշգրիտ մեքենաշինության և այլ որոլտներում»,- ասաց Հարությունյանը՝ հույս հայտնելով, որ տվյալ ծրագիրը թույլ կտա իրականացնել բոլոր նախագծերը։
Ըստ նրա՝ տվյալ փուլում մշակվում են ծրագրի տեխնիկական հարցերը, մասնավորապես, փաստաթղթային, մտավոր սեփականության տեխաբաշխման, երկրների օրենսդրությունների համապատասխանեցման հարցերը։
Աշխատանքային խմբի հաջորդ նիստը տեղի կունենա հուլիսին՝ Ռուսաստանում։ -0-
