ԵՐԵՎԱՆ, 25 մայիսի. /Նովոստի-Արմենիա/. Լեռնային Ղարաբաղի խորհրդարանական ընտրություններն ազատ, անկախ և թափանցիկ էին, ասաց Public International Law and Policy Group միջազգային կազմակերպության ներկայացուցիչ Մայքլ Կովական, ով գլխավորում էր Ղարաբաղի խորհրդարանական ընտրություններին հետևող ամերիկա-հոլանդական դիտորդական առաքելությունը ։
«Մենք ուրախ ենք հայտնել, որ Լեռնային Ղարաբաղն առաջընթաց է արձանագրել ժողովրդավարական զարգացման ուղղությամբ»,- երկուշաբթի հայտարարեց նա Հայաստանում ԼՂՀ մշտական ներկայացուցչությունում տեղի ունեցած մամուլի ասուլիսում։
ԼՂՀ 5-րդ գումարման Ազգային ժողովի` մայիսի 23-ին կայացած ընտրությունների քվեարկության նախնական արդյունքներով՝ մասնակցությունը, նախնական տվյալներով, կազմել է 67,8 տոկոս։ Նախնական արդյունքների համաձայն՝ վարչապետ Արա Հարությունյանի գլխավորած «Ազատ հայրենիք» կուսակցության համամասնական ընտրացուցակի օգտին քվեարկել է քվեարկության մասնակիցների 46, 4 տոկոսը, Արցախի ժողովրդավարական կուսակցության օգտին` (խորհրդարանի խոսնակ Աշոտ Ղուլյանի գլխավորությամբ) 28,6 տոկոսը, ՀՅԴ Արցախի ԿԿ-ի օգտին՝ (ցուցակում առաջինն Արմեն Սարգսյանն է) 20,2 տոկոս, Լեռնային Ղարաբաղի կոմկուսի օգտին՝ (առաջինը՝ Հրանտ Մելքումյան) 4.4 տոկոս:
«Մենք անցկացրեցինք Ղարաբաղի խորհրդարանական ընտրությունների մոնիթորինգ, որի հիման վրա կարող ենք հաստատել, որ ընտրություններն անցել են ազատ, անկախ և թափանցիկ»,- ասաց Կովական՝ նշելով, որ ԼՂՀ ԿԸՀ-ն արդյունավետ կերպով վերահսկել է նախընտրական փուլը և ընտրական գործընթացը Ղարաբաղում։
Ըստ նրա՝ դիտորդական առաքելության ընթացքում անցկացված մոնիթորինգի արդյունքները թույլ են տալիս հաստատել, որ Լեռնային Ղարաբաղը շարունակում է զգալի առաջընթաց արձանագրել կայուն և լիարժեք ժողովրդավարության կայացման գործում։
Միաժամանակ Կովական ավելացրեց, որ որևէ տեղեկություն չի ստացվել էական խախտումների վերաբերյալ ոչ նախընտրական գործընթացի, ոչ էլ ընտրական փուլում։
«Երեք հոգուց բաղկացած մեր պատվիրակությունը հանդիպել է Ղարաբաղի բոլոր խոշոր կուսակցությունների ներկայացուցիչների հետ, ԼՂՀ ԿԸՀ նախագահի, մի շարք պետական և համայնքային գործիչների, ԶԼՄ-ների և հասարակական կազմակերպությունների ներկայացուցիչների հետ։ Պատվիրակությունն այցելել է 8 գլխավոր ընտրատարածքներից 7-ը և որևէ խախտում չի արձանագրել»,- ընդգծեց նա։
Դիտորդը նշեց նաև, որ Ղարաբաղում կարճաժամկետ առաքելության ընթացքում իր գլխավորած պատվիրակությունը հանգել է նրան, որ ընտրական մարմինների, թեկնածուների և քաղաքական կուսակցությունների գործունեությունն ընտրությունների ժամանակ համապատասխանել է ընդունված միջազգային չափորոշիչներին։
ԼՂՀ-ի խորհրդարանական ընտրություններին հետևել են շուրջ 120 միջազգային դիտորդներ 15 պետություններից՝ Հայաստանից, Սլովակիայից, Չեխիայից, ԱՄՆ-ից, Կանադայից, Հարավային Օսեթիայից, Ֆրանսիայից, Արգենտինայից, Գերմանիայից, Աբխազիայից, Հոլանդիայից, Դանիայից և Մերձդնեստրից։ Ընտրությունները լուսաբանել են տեղական և օտարերկրյա ԶԼՄ-ների շուրջ 60 ներկայացուցիչներ։
Ռուսաստանի և Հայաստանի դիտորդները Ղարաբաղի ընտրությունները ճանաչել են լեգիտիմ, ազատ, ժողովրդավարական, թափանցիկ, ամբողջովին պատասխանող ԼՂՀ ընտրական օրենսգրքին և միջազգային բոլոր բարձր չափանիշներին։ -0-
