Եվրահանձնաժողովի բանաձևը հայկական դիվանագիտության թույլ քաղաքականության արդյունք է

ԵՐԵՎԱՆ, 24 մայիսի. /Նովոստի-Արմենիա/. Եվրահանձնաժողովի՝ Հարավային Կովկասում հակամարտությունների կարգավորման բանաձևի ընդունումը, որը վերաբերում է նաև ղարաբաղյան հակամարտությանը, Հայաստանի թույլ և անկազմակերպ արտաքին քաղաքականության արդյունք է, հայտնեց Հայաստանի Ազգային ժողովի Պաշտպանության, ազգային անվտանգության և ներքին գործերի մշտական հանձնաժողովի նախագահ Հրայր Կարապետյանը։

Եվրահանձնաժողովը մայիսի 20-ին բանաձև ընդունեց Հարավային Կովկասի հակամարտությունների կարգավորման վերաբերյալ, որը պատրաստել էր բուլղարացի խորհրդարանական Եվգենի Կիրիլովը։ Բանաձևում «հայկական զորքերն Ադրբեջանի «օկուպացված տարածքներից» դուրս բերելու կոչ» է հնչում:

«Հայաստանի դիվանագիտական կորպուսներն այսօր վատ են աշխատում, դեսպանները վատ են աշխատում, հայկական պատվիրակությունները վատ են աշխատում, և ես վստահ հայտարարում եմ, որ նրանց մի մասը հստակ չի հասկանում իրենց առջև դրված խնդիրների կարևորությունը»,- Երկուշաբթի մամուլի ասուլիսում հայտարարեց Կարապետյանը՝ նշելով, որ նման քաղաքականությունը հանգեցրել է Եվրահանձնաժողովի այս բանաձևի ընդունմանը։

Ըստ նրա, սա վերաբերում է նրանց, ովքեր պատասխանատու են Ղարաբաղի կոնկրետ տարածքների համար, կոնկրետ պետությունների քաղաքականության համար, ինչի ուղղությամբ, ըստ նրա, նրանք ոչինչ չեն անում։

«Ի սկզբանե սխալ կա Հայաստանի արտաքին քաղաքականության ռազմավարության մեջ։ Մենք մշտապես սպասում ենք, թե երբ հայտարարություն կլինի Թուրքիայի կամ Ադրբեջանի կողմից, որպեսզի մեր արտգործնախարարը որևէ պատասխան մեկնաբանություն տա, և մենք ինքներս էլ ոչինչ չենք անում»,- նշեց Կարապետյանը։

Ըստ նրա, Հայաստանը հանդես է գալիս պաշտպանվողի դերում և միշտ պաշտպանվում է արտաքին քաղաքականությունում։

«Բայց այսպես չպետք է լինի։ Ադրբեջանաթուրքական տանդեմն այսօր լիարժեք աշխատում է քաղաքական-քարոզչական դաշտում, իսկ մենք ընդամենը պատասխանում ենք»,- հավաստիացրեց պատգամավորը, հավելելով, որ հայկական դիվանագիտությունն այսօր նախաձեռնող չէ իր արտաքին քաղաքականության մեջ։

Կարապետյանը կոչ արեց լուրջ հետևություններ կատարել այդ բանաձևից։

«Միաժամանակ այս բանաձևից ողբերգություն էլ պետք չէ սարքել։ Սա քաղաքական-քարոզչական փաստաթուղթ է։ Ադրբեջանական բոլոր կայքերում այդ լուրն ընկալել են հիացմունքով, բայց սա ողբերգության առիթ չէ»,- ընդգծեց նա։ -0-