Ռուսաստանը, լինելով ԵԱՀԿ Մինսկի խմբի համանախագահ երկիր, իր ավանդն է ներդնում և բավականին կարևոր ու կառուցողական դեր է խաղում ղարաբաղյան կարգավորման գործում, ասաց Հայաստանի արտգործնախարար Էդվարդ Նալբանդյանը։
«Ինչպես և որտեղ է դա արտահայտվում, ոչինչ չի փոխում մոտեցումների կառուցողականության համատեքստում, և, բնական է, որ համանախագահների ներդրած ջանքերի հետ մեկտեղ Ռուսաստանի նախագահ Դմիտրի Մեդվեդևը զգալի անձնական ավանդ է ներդնում այդ ջանքերի մեջ»,- ուրբաթ ճեպազրույցում հայտարարեց Նալբանդյանը։
Ռուսաստանի նախագահ Դմիտրի Մեդվեդևը մայիսի 12-13-ն Անկարա կատարած այցի արդյունքում հայտարարել է, որ Մոսկվան և Անկարան մտադիր են օժանդակել կովկսայան տարածաշրջանում կայունության ամրապնդմանը և, մասնավորապես, Լեռնային Ղարաբաղի հակամարտության լուծմանը։ Նախագահն ավելացրել է, որ «Ռուսաստանն իր կողմից առաջ կտանի այդ գործընթացը, կօգտագործի բոլոր հնարավորությունները, հեղինակությունն ու ազդեցությունը»։
Ինչպես նշեց Նալբանդյանը, ռուս նախագահի նախաձեռնությամբ մի շարք հանդիպումներ անցկացվեցին Հայաստանի և Ադրբեջանի նախագահներ Սերժ Սարգսյանի և Իլհամ Ալիևի միջև։
«Բնական է, որ ռուս նախագահը ցանկություն է հայտնում շարունակել ջանքերը կարգավորման գործում կողմերին աջակցության առումով»,- ասաց Նալբանդյանը։
Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին։
1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։
Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։
1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։ Պատերազմի հետևանքով երկու կողմից զոհվեց մոտավորապես 25-30 հազ մարդ և մոտ մեկ միլիոնը ստիպված եղավ լքել բնակավայրերը։
Զինադադարի ռեժիմի մասին համաձայնությունը պահպանվում է մինչ այժմ։
1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան։-0-
