Հայաստանի պատվիրակությունը մեկնել է Սանկտ Պետերբուրգ

Հայաստանի պատվիրակությունը՝ վարչապետ Տիգրան Սարգսյանի գլխավորությամբ, ուրբաթ առավոտյան մեկնել է Սանկտ Պետերբուրգ` մասնակցելու Եվրասիական տնտեսական ընկերակցության (ԵվրԱզԷՍ) միջպետական խորհրդի 26-րդ նիստին և Անկախ պետությունների համագործակցության (ԱՊՀ) կառավարությունների ղեկավարների խորհրդի նիստին, հաղորդում է կառավարության լրատվական ծառայությունը:

Կառավարական պատվիրակության կազմում են ՀՀ կառավարության աշխատակազմի ղեկավար Դավիթ Սարգսյանը, ֆինանսների նախարար Տիգրան Դավթյանը, արտաքին գործերի նախարարի տեղակալ Շավարշ Քոչարյանը,  ֆինանսների փոխնախարար Մուշեղ Թումասյանը, պաշտոնատար այլ անձինք:

ԱՊՀ կառավարությունների ղեկավարների խորհրդի նիստին ծրագրվում է քննարկել էներգետիկայի, ռադիոնավիգացիայի, սահմանային վերահսկողության, գիտատեխնիկական համագործակցության, ստանդարտացման, չափագիության և  արտոնագման ոլորտներում համագործակցության հարցեր:

ԵվրԱզԷՍ-ի միջպետական խորհրդի նիստին կքննարկվի ԵվրԱզԷՍ-ի դատարանի կարգավիճակի նոր խմբագրության նախագիծը: Ծրագրվում է մի շարք համաձայնագրերի ստորագրում, մասնավորապես, կրթական հաստատությունների հավատարմագրման և արտոնագրման, գյուղատնտեսական տեխնիկայի միջազգային լիզինգի մասին:  

Միջպետխորհուրդը կհաստատի նորարարության և կենսատեխնոլոգիաների միջպետական նպատակային ծրագիրը, որը մշակվել է Բելառուսի նախաձեռնությամբ: Կքննարկվեն նաև ֆինանսաբյուջետային հարցեր:--0--