Օտարերկրացիներն ամեն տարի 30-35 հայ երեխա են որդեգրում

Ամեն տարի օտարերկրացիները 30-35 հայ երեխա են որդեգրում, տեղեկացրեց Հայաստանի արդարադատության փոխնախարար Գևորգ Մալխասյանը։

Վիճակագրական պաշտոնական տվյալների համաձայն՝ 2009 թվականին  Հայաստանում որդեգրվել է 22 տղա և նույնքան էլ աղջիկ։ Միաժամանակ 2009 թվականին օտարերկրացիների կողմից որդեգրվել է 18 հայ երեխա։

«Օտարերկրացիների մեծամասնությունը որդեգրում է այն երեխաներին, որոնց չեն ցանկանում դաստիարակել Հայաստանի քաղաքացիները։ Հիմնականում նրանք հիվանդ երեխաներ են, որոնց օտարերկրացիներն արտասահման են տանում բուժման նպատակով»,- ասաց Մալխասյանը հինգշաբթի խորհրդարանի նիստում՝ ներկայացնելով երկրի Ընտանեկան օրենսգրքի լրացումների նախագիծը։

Ըստ նրա՝ օտարերկրացիների կողմից հայ երեխաների որդեգրման համաձայնություն է տալիս երկրի կառավարությունը։ Միաժամանակ օտարերկրացու կողմից որդեգրված երեխան, ինչպես հիշեցրեց Մալխասյանը, կորցնում է Հայաստանի քաղաքացիությունը։

Փոխնախարարն ավելացրեց, որ երկրի կառավարության կողմից Ընտանեկան օրենսգրքի առաջարկած լրացումների համաձայն՝ որգեդրման համաձայնության թույլտվության ստացումը կառավարության կողմից տարածվում է նաև արտասահմանում մշտական բնակություն հաստատած Հայաստանի քաղաքացիների վրա։

Մալխասյանն ասաց, որ Ընտանեկան օրենսգրքի լրացումների համաձայն՝ երաշխավորվում է նաև ընտանիքում ապրելու և դաստիարակվելու, կենսաբանական ծնողներին ճանաչելու իրավունքը, ծնողների խնամքի և խնամակալության, երեխաների հետ համատեղ բնակվելու իրավունքը՝ բացառությամբ այն դեպքերի, երբ դա հակասում է երեխայի շահերին։

Ինչպես նշեց փոխնախարարը, լրացումների նախագծով կարգավորվում է երեխաների ծննդյան գրանցումը ՔԿԱԳ մարմիններում։ -0-