«Կովկաս-2009» միջազգային գիտաժողովը, որը կազմակերպել է Կովկասի Ինստիտուտը, մենկարկում է ուրբաթ Երևանում, «Նովոստի-Արմենիա» գործակալությանը հաղորդեցին ինստիտուտի մամուլի ծառայությունից:
Բացման խոսքով հանդես կգա Հայաստանում Եվրոպական միության պատվիրակության գործերի ժամանակավոր հավատարմատար Օննո Սիմոնսը:
Երկօրյա գիտաժողովի ընթացքում մասնակիցները՝ գիտնականներ, լրագրողներ և քաղաքական գործիչներ՝ Հայաստանից, Վրաստանից, Թուրքիայից, Ռուսաստանից և Եվրոպական երկրներից, կքննարկեն մի շարք թեմաներ` 2009թ-ի Հյուսիսային և Հարավային Կովկասի քաղաքական, սոցիալական և տնտեսական զարգացումները, ԱՄՆ-ի, Եվրոպայի, Թուրքիայի և Ռուսաստանի 2009թ-ի քաղաքականությունը Կովկասում:
Քննարկումների թեման կդառնա նաև հարավկովկասյան տարածաշրջանում անվտանգությունը, չճանաչված Կովկասյան հանրապետությունները և էթնաքաղաքական հակամարտությունները:
Զեկուցումներով հանդես կգան Միթաթ Չելիկպալան` ՏՕԲԲ Տնտեսագիտության և Տեխնոլոգիաների Համալսարանից (Անկարա), Ռիչարդ Գիրագոսյանը` Ռազմավարական և ազգային հետազոտությունների հայկական կենտրոնից (Երևան), Իվլիան Խաինդրավա` Զարգացման և համագործակցության կենտրոն, Թբիլիսի, Ալեքսանդր Կրիլովը` Համաշխարհային Տնտեսագիտության և Միջազգային հարաբերությունների ինստիտուտից (Մոսկվա), Սերգեյ Մարկեդոնով` Ռազմական և քաղաքական վերլուծության ինստիտուտից (Մոսկվա), Էդուարդ Նաղդալյանը` Դելովոյ Էքսպրես շաբաթաթերթից (Երևան):
Այս գիտաժողովը «Հայաստանում Քաղաքական բանավեճերի ներուժի մեծացում» ծրագրի մի մասն է, որը ֆինանսավորվում է Եվրամիության կողմից (180,000 եվրո) : Գիտաժողովին աջակցում են նաև Զարգացման և համագործակցության շվեյցարական հիմնադրամը և Հենրիխ Բյոլի հիմնադրամը: -0-
