«Ոսկե ծիրան» ամենամյա յոթերորդ փառատոնի բացումը տեղի կունենա հունիսի 11-ին, տեղեկացվում է կինոփառատոնի պաշտոնական կայքում:
Ձևավորված ավանդույթի համաձայն, մինչև հուլիսի 18-ը տևող փառատոնի մրցութային ծրագիրը կներկայացվի երեք հիմնական անվանակարգում՝ միջազգային- խաղարկային ֆիլմ, վավերագրական ֆիլմ և «Հայկական համայնապատկեր»:
«Լավագույն միջազգային խաղարկային ֆիլմ» անվանակարգում հաղթողին 2 միլիոն դրամ (մոտ $5200) չափով դրամական պարգև կհանձնվի, «Լավագույն վավերագրական ֆիլմ» և «Հայկական բնապատկեր» անվանակարգերում «Ոսկե ծիրան» մրցանակի արժանացածներին՝ 1 միլիոն դրամ (մոտ $2600):
Բացի ժյուրիի երեք կազմից, փառատոնին կաշխատեն նաև «Ֆիպրեսի»-ի (Կինոմամուլի միջազգային ֆեդերացիա) անկախ ժյուրին և Էկումենիկ կամ եկեղեցական ժյուրին, որը գործում է գրեթե բոլոր միջազգային փառատոներում:
Ամեն տարի իրականացվող «Ոսկե ծիրան» միջազգային կինոփառատոնը հիմնվել է Հայաստանի Հանրապետության մայրաքաղաք Երևանում 2004թ-ին «Ոսկե ծիրան» կինոյի զարգացման հիմնադրամի, Կինոգետների և կինոլրագրողների հայկական ասոցիացիայի կողմից` ՀՀ արտաքին գործերի նախարարության, ՀՀ մշակույթի նախարարության և Մշակույթի զարգացման բարեգործական հիմնադրամի աջակցությամբ: «Ոսկե ծիրան» միջազգային կինոփառատոնի կազմակերպիչներն են` փառատոնի գլխավոր տնօրեն, կինոռեժիսոր Հարություն Խաչատրյանը, ծրագրերի տնօրեն, կինոքննադատ Միքայել Ստամբոլցյանը և գեղարվեստական տնօրեն, կինոքննադատ Սուսաննա Հարությունյանը:
-0-
