Հայաստանի «Հովեր» կամերային երգչախումբն առաջին անգամ իր արվեստը կներկայացնի Ֆրանսիայում ացնկացվելիք եվրոպական ստուգատեսին

Հայաստանի պետական կամերային «Հովեր» երգչախումբն առաջին անգամ իր արվեստը կներկայացնի Ֆրանսիայում ացնկացվելիք եվրոպական ստուգատեսին, չորեքշաբթի լրագրողներին հայտնեց երգչախմբի գեղարվեստական ղեկավար Սոնա Հովհաննիսյանը՝ ներկայացնելով խմբի ապագայի ծրագրերը:  

«Եվրոպական ստուգատեսը, որին այս տարի կներկայացվի շուրջ 12 լավագույն երաժշտական երգչախումբ ողջ աշխարհից, երաժշտական տոնավաճառ է, որտեղ հարյուրավոր մենեջերներ ողջ աշխարհից «գնում» են իրենց առավել դուր եկած համույթները»,- ասաց նա։

Այդ լայնամասշտաբ միջոցառմանը, Հովհաննիսյանի խոսքերով, «Հովերը» նախատեսում է հանդես գալ հինգ համերգով՝ ներկայացնելով հայ մեծ կոմպոզիտոր Կոմիտասի երաժշտական ստեղծագործությունները։
 
Երգչախմբի գեղարվեստական ղեկավարի խոսքերով՝ «Հովեր» երգչախմբի հաջող ելույթը ստուգատեսում աշխատանքով կապահովվի համույթը երկար ժամանակ, ինչն իր հերթին թույլ կտա լուծել ֆինանսական առկա բոլոր խնդիրները։

Խոսելով այս տարվա նվաճումների մասին՝ Հովհաննիսյանը նշեց «Հովերի» հաջողված ելույթը Զատկին նվիրված Մոսկվայի իններորդ փառատոնին, որն անցկացվեց Ռուսաստանում ապրիլի 4-ից մայիսի 9-ը։

Բացի «Հովերից» փառատոնին հաջող ելույթ ունեցավ նաև Հայաստանի պետական երիտասարդական անսամբլը՝ դիրիժոր Սերգեյ Սմբատյանի գլխավորությամբ։

Իր հերթին, ներկայացնելով համույթի հետագա ծրագրերը, Սմբատյանը նշեց, որ ամռանը նախատեսվում են եվրոպական խոշոր հյուրախաղեր, որի բարձրակետը կլինի Բեռլինում անցկացվելիք գալա-համերգը։ -0-