Հայաստանի Ազգային Ժողովի պատգամավորները երեքշաբթի նիստում առաջին ընթերցմամբ փոփոխություններ և լրացումներ են կատարել երկրի Ընտրական օրենսգրքում։
Ինչպես հայտնեց Հայաստանի արդարադատության նախարար Գևորգ Դանիելյանը, լրացումների կատարումն օրենսգրքում պայմանավորված է Կոռուպցիայի դեմ պայքարի պետությունների խմբի (GRECO) առաջարկություններով։
«Առաջարկությունների համաձայն, անհրաժեշտ է վերանայել դատավորներին և դատախազներին անձեռնմխելիությունից զրկելու ընթացակարգերը՝ նվազեցնելով բարձրաստիճան պաշտոնատար անձանց, օրինակ, նախագահի, խորհրդարանի և գլխավոր դատախազի մասնակցության աստիճանը»,- ասաց նախարարը։
Ինչպես տեղեկացրեց Հայաստանի արդարադատության նախարարը, լրացումների նախագծով առաջարկվում է նաև անձեռնմխելիությունից զրկել պատգամավորների, ԿԸՀ-ի և մարզային ընտրական հանձնաժողովների անդամների, համայնքների ղեկավարների և ավագանու խորհուրդների անդամների թեկնածուներին։ Դանիելյանն ավելացրեց, որ փոփոխությունների կատարումն Ընտրական օրենսգրքում պայմանավորված է այն Հայաստանի Սահմանադրությանը համապատասխանեցնելու անհրաժեշտությամբ, որտեղ սահմանված է անձեռնմխելիությունից օգտվող անձանց հստակ շրջանակը։
Նախարարն ավելացրեց, որ այս կերպ կկրճատվի այն մարդկանց ցուցակը, ովքեր օգտվում են անձնական անձեռնմխելիությունից, և դրանում կմնան նախագահը, պատգամավորները, դատավորներն ու Օմբուդսմենը։ -0-
