«Եվրատեսիլ 2010»-ի հայկական խմբի զգեստները կպատրաստի Եվա Ռիվասի մոսկովյան անհայտ ընկերը

ԵՐԵՎԱՆ, 17 մայիսի. /Նովոստի-Արմենիա/. «Եվրատեսիլ 2010»-ի հայկական խմբի զգեստները կպատրաստի մոսկովյան մոդելավորող, Հայաստանի ներկայացուցիչ Եվա Ռիվասի անհայտ ընկերը, «Նովոստի-Արմենիա» գործակալությանը հայտնեց ինքը երգչուհին։

Միաժամանակ, Ռիվասը չհայտնեց մոդելավորողի անունը՝ խոստանալով հրապարակել այն ավելի ուշ։ Նա նշեց միայն, որ աշխատում է ռուսական բազմաթիվ աստղերի հետ։

Ռիվասի խոսքերով, նա հույս ունի, որ իր ելույթի շնորհիվ նրա ընկերոջ անունն ավելի հայտնի կդառնա։

Ինչպես նշեց երգչուհին, զգեստները բավական հասարակ կլինեն։ «Ամեն ինչ շատ հասարակ կլինի, արտասովոր ոչինչ չի լինի»,- նշեց նա։

«Եվրատեսիլ-2010» մրցույթին Եվա Ռիվասը կկատարի «Apricot stone» (Ծիրանի կորիզ) երգը, որի երաժշտությունը գրել է կոմպոզիտոր Արմեն Մարտիրոսյանը, իսկ բառերը՝ Կարեն Կավալերյանը։ Երգում ասվում է այն մասին, որ գետնին նետած ծիրանի կորիզից մինչև երկինք ծիրանի ծառ կաճի՝ Հայաստանի խորհրդանիշը։

Բեք-ոկալ կապահովեն Տիգրան Պետրոսյանը, Դորիանս խմբի մենակատար Գոռ Սուջյանը և Մարիամ Մեհրաբովան։

Մայիսի 27-ին Ռիվասը երկրորդ համարի ներքո ելույթ կունենա երկրորդ կիսաեզրափակչում, որին կմասնակացեն Ուկրաինայի, Թուրքիայի, Վրաստանի և Ադրբեջանի ներկայացուցիչները։ Երաժշտական մրցույթի առաջին կիսաեզրափակիչը տեղի կունենա մայիսի 25-ին, իսկ եզրափակիչը՝ մայիսի 29-ին։-0-