ԵՐԵՎԱՆ, 17 մայիսի./Նովոստի-Արմենիա/. «Մշակութային ժառանգությունը հասանելի է բոլորին» ակցիան կանցկացվի մայիսի 18-ին Երևանում՝ Թանգարանների միջազգային օրը, հայտնեց ICOM Հայաստանի ազգային կոմիտեի և Թանգարանային աշխատողների ասոցիացիայի գործադիր տնօրեն Մարինե Հարոյանը։
«Գաղտնիք չէ, որ մեր հասարակությունում մեր հայրենակիցներից շատերը որոշակի խնդիրներ ունեն, որոնք կապված են տեղաշարժման հետ, և բնական է, որ նրանց դժվար է թանգարան այցելել։ Այդ պատճառով որոշվել է հատուկ հաշմանդամների համար ակցիա կազմակերպել»,- երկուշաբթի «Նովոստի» միջազգային մամուլի կենտրոնում մամուլի ասուլիսի ժամանակ ասաց Հարոյանը։
Ըստ նրա՝ ակցիան երկու հիմնական նպատակ է ունի՝ դարձնել Հայաստանի մշակութային ժառանգությունը իսկապես հասանելի հասարակության բոլոր անդամների համար, և իհարկե, կառավարության և հանրապետության ղեկավար կառույցների ուշադրությունը բևեռել ֆիզիկական սահմանափակ հնարավորություններ ունեցող մարդկանց խնդիրներին։
Հարոյանն ավելացրեց, որ ակցիայի անցկացմանը միանգամից արձագանքել է «Գաֆեսջյան» Արվեստի կենտրոնը, որը Երևանի այն քիչ թանգարաններից է, որի առաջին հարկը գործնականում հարմարեցված է հաշմանդամների տեղաշարժմանը։
Ըստ նրա՝ Թանգարանների օրը հաշմանդամները կկարողանան անվճար այցելել «Գաֆեսջյան» կենտրոն և ծանոթանալ ցուցանմուշներին։
Իր հերթին «ՈՒնիսոն» հասարակական կազմակերպության գործադիր տնօրեն Արմեն Ալավերդյանը նշեց, որ ակցիային կմիանա նաև հաշմանդամների «Փարոս» կամերային երգչախումբը։
Ալավերդյանը նշեց, որԿոմիտասի անվան Երևանի պետական կոնսերվատորիայի Սարաջյանի անվան սիմֆոնիկ նվագախմբի նվագակցությամբ «Փարոս» երգչախմբի կատարմամբ կհնչի Անտոնիո Վիվալդիի «Գլորիա» կանտատան։
«Մենք շատ քիչ մշակութային օջախներ ունենք, որոնք հարմարեցված են ֆիզիկական սահմանափակ հնարավորություններ ունեցաղ մարդկանց համար։ Դրանց մեջ կարելի է նշել «Նարեկացի» արվեստի միությունը։ Նույնը կարելի է ասել «Գաֆեսջյան» Արվեստի կենտրոնի առաջին հարկի մասին»,- ավելացրեց նա։
Ակցիան կանցկացվի ՀՀ մշակույթի նախարարությանն աջակցությամբ՝ Թանգարանների միջազգային խորհրդի (ICOM) Հայաստանի ազգային կոմիտեի, Թանգարանային աշխատողների ասոցիացիայի, «Ունիսոն» և «Հույսի կամուրջ» հասարակական կազմակերպությունների մասնակցությամբ:
Թանգարանների միջազգային օրը (International Museum Day) օրացույցում հայտնվել է 1977թ.-ին, երբ ICOM-ի (International Council of Museums — Թանգարանների միջագզային խորհուրդ) հերթական նիստին ընդունվեց ռուսական կազմակերպության՝ այդ տոնը հիմնելու մասին առաջարկը: Եվ 1977թ.-ից այդ օրը ամեն տարի նշվում է ավելի քան 150 երկրներում:
Թանգարանների միջազգային օրը ամեն տարի անցկացվում է որոշակի կարգախոսով: 2010թ. կարգախոսն է՝ «Թանգարանները հանուն ներդաշնակ հասարակության»:
