«Թանգարանների գիշեր» ակցիայի շրջանակներում շաբաթ օրը ՀՀ նախագահ Սերժ Սարգսյանն այցելել է հայտնի հայ նկարիչներ, ամուսիններ Հարություն և Արմինե Գալենցների նոր թանգարանը։ Պետության ղեկավարը դիտել է ցուցադրությունը, որտեղ ներկայացված է ավելի քան 300 կտավ՝ նկարիչների շուրջ 1000 աշխատանքներից, որոնք պահվում են թանգարանում։
Թանգարանը հիմնադրվել է նկարիչների արվեստանոցի հիման վրա և բացվել է 2010թ.-ի փետրվարի 27-ին։
Ըստ «Գալենց» մշակութային հիմնադրամի և թանգարանի տնօրեն Լարիսա Կատասանովայի՝ մինչև թանգարանի բացումը նկարները վատ պայմաններում էին պահվում։ Նա նշեց, որ թանգարանի ստեղծման աշխատանքները սկսվել են դեռ 2002թ.-ին և շարունակվել շուրջ ութ տարի։
Իր հերթին Հարություն և Արմինե Գալենցների որդին՝ Սարո Գալենցը լրագրողներին ասաց, որ թանգարանը նախատեսված է ոչ միայն հասարակ այցելուների համար, այլ նաև պրոֆեսիոնալ արվեստագետների համար։ «Առանց այս թանգարանի կերպարվեստի պատմության շղթան ամբողջական չէր լինի»,- ասասց նա։
Թանգարանի բացումը նվիրված էր Արմնինե Գալենցի 90 և Հարություն Գալենցի 100-ամյա հոբելյաններին։ Հեռանկարներում ծրագրվում է նկարիչների աշխատանքների ցուցահանդեսի բացումը Լիբանանում։
Հարություն Գալենցը հայ նկարիչ է։ Ծնվել է 1910 թվականին Կյուրուն քաղաքում (Օսմանյան կայսրության)։ 1915 թվականին, փրկվելով Հայոց ցեղասպանությունից, հայտնվել է Հալեպում, որտեղ մինչև 1922 թվականն ապրել է որբանոցում։ 1927 թվականին բնակություն է հաստատել Տրիպոլիում (Լիբանան), իսկ 1930-ին տեղափոխվել է Բեյրութ և սկսել է զբաղվել ակտիվ ստեծագործական կյանքով։ 1946 թվականին վերջնականապես տեղափոխվել է Հայաստան։
