ՀՄՊ մասնակիցների հիշատակը հավերժացնելն օգնում է երիտասարդների ռազմահայրենասիրական դաստիարակությանը. Օհանյան

Հայրենական մեծ պատերազմի մասնակիցների հիշատակն ու սխրանքը, հերոսությունը, անձնազոհությունը հավերժացնելը մեծ նշանակություն ունի երիտասարդ սերնդի և, մասնավորապես, զինծառայողների ռազմահայրենասիրական դաստիարակության գործում, ասել է ՀՀ պաշտպանության նախարար Սեյրան Օհանյանը «Սոբեսոդնիկ Արմենիի» թերթին տված հարցազրույցում։

Նա հիշեցրեց, որ Հայաստանի կառավարությունը հաստատել է Հայրենական մեծ պատերազմում տարած հաղթանակի 65-ամյակին նվիրված միջոցառումների ծրագիրը, որի համաձայն՝ պաշտպանության նախարարությունը, հաստատված ժամանակացույցի համաձայն, համահայկական և հանրապետական մակարդակի մի շարք հիշատակի և տոնական միջոցառումներ է անցկացրել:

«Հայաստանի Հանրապետության ողջ տարածքում Հայրենական մեծ պատերազմում ընկած զինվորներին նվիրված հուշարձանները կցված են զինվորական մասերին, որոնց անձնակազմը տեղական իշխանությունների հետ համատեղ խնամում է դրանք, նորոգում, բարեկարգում հարող տարածքը»,- ասել է պաշտպանության նախարարը։

Ըստ նրա՝ Հայաստանի Զինված ուժերի զորամասերում և հանրակրթական դպրոցներում արդեն մի շարք հանդիպումներ են տեղի ունեցել Հայրենական մեծ պատերազմի վետերանների հետ, կազմակերպվել են երեկոներ և մեծարման երեկոներ։ Զորամասեր են հրավիրվել Երկրորդ համաշխարհային պատերազմի վետերաններ և Արցախյան պատերազմի մասնակիցներ։

«Ցավոք, ներկայումս Հայաստանում մնացել է Հայրենական մեծ պատերազմի ընդամենը մոտ 4200 վետերան, և մեր պետության ու բոլորիս պարտքն է միշտ ուշադրության կենտրոնում պահել նրանց կարիքներն ու հոգսերը, հարգանք ցուցաբերել և երախտագիտություն հայտնել նրանց»,- ասել է Հայաստանի պաշտպանության նախարարը։

Նա նշել է, որ Հայրենական մեծ պատերազմի 65-ամյակի կապակցությամբ Երևանում, մարզկենտրոններում և հանրապետության բոլոր խոշոր բանկավայրերում մայիսի 8-15-ն անցկացվում են հանդիսավոր միջոցառումներ, որոնց շրջանակներում կառավարական հանձնաժողովի անդամները, պաշտպանության նախարարության զինվորական հրամանատարության և Զինված ուժերի Գլխավոր շտաբի ներկայացուցիչները 4200 վետերանների հանձնեցին հոբելյանական մեդալներ և տոնական բացիկներ։ -0-