Շուշին կվերականգնի հայկական մշակույթի կենտրոնի իր համբավը. ՀՀ պաշտպանության նախարար

ԵՐԵՎԱՆ, 14 մայիսի. /Նովոստի-Արմենիա/. Հայաստանի պաշտպանության նախարար Սեյրան Օհանյանը վստահ է, որ ղարաբաղյան Շուշի քաղաքը կվերականգնի հայկական մշակույթի կենտրոնի իր համբավը:

Շուշին՝ Լեռնային Ղարաբաղի մեծությամբ երկրորդ քաղաքը, դարերի ընթացքում հայկական մշակույթի և կրթության կենտրոններից մեկն է եղել: Այն ղարաբաղյան զորամիավորումների կողմից ազատագրվել է 1992թ. մայիսի 9-ին:

«Ես վստահ եմ, որ այժմ, երբ Շուշին ազատագրված է ադրբեջանական գերությունից, այն կվերականգնի իր երբեմնի փայլը և հայկական մշակույթի կենտրոնի իր համբավը»,- ասել է  Օհանյանը «Սոբեսոդնիկ Արմենիի» թերթին տված հարցազրույցում։
 
Ըստ նրա՝ դարեր շարունակ Շուշին շատ կարևոր մշակութային դեր է խաղացել ոչ միայն հայ ժողովրդի, այլև ողջ Կովկասի համար։ «Քաղաքը հայտնի է եղել իր դպրոցներով, զարգացած առևտրով և արհեստներով։ Գտնվելով առևտրային կարևոր ուղիների խաչմերուկում՝ Շուշին միշտ եղել է նաև մշակույթների խաչմերուկում»,- ասել է Օհանյանը։ -0-